O Alcalde de Monforte de Lemos, José Tomé Roca, acompañado pola 1ª Tenente de Alcalde, Gloria Prada, e os Concelleiros de Deportes e Servizos, José Manuel Mougán e José Luis Losada, ademais do Presidente do Club Lemos, Óscar Manuel López, inaugurou este domingo pola tarde o novo céspede do Campo municipal de fútbol da Pinguela, logo de que remataran a obras de renovación do terreo de xogo.
O rexedor monfortino recordou que “esta foi a primeira actuación deste tipo que se acometeu no Campo da Pinguela dende a súa inauguración no ano 1999, e gracias a ela dende o Equipo de Goberno vimos de mellorar significativamente estas instalacións e os servizos que nelas ofertamos”.
Este proxecto de mellora enmárcase dentro das actuacións en instalacións deportivas do Concello que está levando o Equipo de Goberno, e que inclúe o campo dos PP Escolapios así como o Campo Municipal de Fútbol Luis Bodegas.
A empresa que levou a cabo a obra de mellora no Campo municipal da Pinguela foi “Calfensa Proyectos S.L.” O Concello destinou un orzamento de 48.309,25 €. Logo do acto inaugural, no que tamén tivo lugar a actuación do grupo monfortino Batukada Creativa, foi o partido entre o Club Lemos e a Sarriana, o encargado de estrear o novo céspede.
