Organización e persoal voluntario están xa metidos de cabeza na QTC, Quiroga Trail Challenge, proba que este ano chega á súa novena edición. Este venres 3 de febreiro arrinca o evento coa entrega de dorsais e unha charla técnica a cargo do seu director de carreira,  Blas Rodríguez, e parte do seu equipo.

Unha edición que conta con sorpresas ata o final. Aos cambios de percorrido para evitar zonas queimadas polos lumes do verán pasado engádenselle outros cambios que houbo que deseñar para salvar esborrallamentos que ocasionaron as choivas e as enchentes dos ríos estas pasadas semanas.

“Buscamos sempre, ante todo, a seguridade de corredores e voluntarios. É a nosa máxima prioridade”, apunta a organización que traballa contra reloxo para que todo estea a punto.

Mañá, sábado 4 de febreiro, terán lugar catro carreiras de diferentes distancias (ultra, maratón, trail e minitrail) e a andaina “Coureleando”. Todas elas contan con importante representación de deportistas moi destacados no mundo do trail, e non só de Galicia senon tamén de toda a Península.

 Como “favoritos” da distancia ultra estarán Fernando Arca e José Manuel Gil (gañadores do ultra e circuíto ultra, respectivamente), ademais do cántabro Fidel Fernández. En mulleres, a vasca Silvia Trigueros (tres veces gañadora do Tor de Geants) e a madrileña Carla Junquera.

Na maratón disputarán os primeiros postos o cántabro Sergio Besoy e a mallorquina Angels LLobera, ademaos de destacados representantes do trail galego e doutras comunidades.

O domingo, día 5, tocará territorio Lor co trail e o minitrail; probas e percorridos que tampouco defraudarán.

A predicción meteorolóxica avanza unha fin de semana de sol e temperaturas baixas, sobre todo a primeiras e últimas horas do día. Daquela, a recomendación é protexerse con roupa de abrigo, revisar o material obrigatorio, acudir en tempo, subir pulsacións e gozar a tope da xa bautizada como “Festa do Trail Galego”.