Este sábado pola tarde o Club Korbis fixo entrega ao alcalde de Monforte, José Tomé, dun trofeo conmemorativo en agradecemento “pola súa implicación co deporte base da cidade de Monforte e polo seu apoio mostrado ó voleibol”.
A homenaxe tivo lugar, no pavillón polideportivo da Pinguela, durante a celebración da festa organizada polo Club Deportivo Korbis para homenaxear ós xogadores e xogadoras dos diferentes equipos de voleibol que o conforman. Da celebración participaron ademais dos deportistas e diferentes membros do club, pais, nais, familiares, simpatizantes e colaboradores, entre os que se atopa o Concello de Monforte.
Tras este recoñecemento, disputáronse dous partidos co Club Voleibol Cambados, nas categorías alevín e cadete feminino.
