Deportistas de modalidades individuais empadroados na provincia poden solicitar as bolsas convocadas pola Vicepresidencia da Deputación de Lugo, cun investimento total de 100.000 euros. A área de Deportes distribuirá 230 bolsas destinadas a financiar gastos derivados da actividade competitiva, apoiando e fomentando a participación de deportistas de modalidades individuais en competicións.
O vicepresidente da Deputación Efrén Castro sinalou que “a convocatoria trata de responder sobre todo ás necesidades de deportistas en etapas de iniciación, e polo tanto de colaborar nuns gastos que atenden fundamentalmente as familias, desde licenzas ou inscricións en competicións ata transporte ou o material deportivo”.
As bolsas, que oscilan entre os 300 e os 2.500 euros, asígnanse en función dos resultados deportivos acadados en probas e campionatos en cada nivel de competición, desde campionatos provinciais ata europeos e mundiais, ao longo de 2023.
PRESENTACIÓN DE SOLICITUDES
As bases para coñecer se os/as deportistas poden ser beneficiarios/as das axudas e saber que pasos hai que seguir, xa sexa tramitando as solicitudes de forma presencial ou de forma telemática, pódese acceder á páxina web seguinte da Deputación de Lugo.
O prazo remata o vindeiro venres 12 de abril.
