O domingo, 21 de abril, celébrase a 8ª Andaina polo Corazón de Galicia, que organiza Atletismo Chantada coa colaboración do Concello de Chantada. A Andaina, que ten como obxectivo dar a coñecer novas rutas de sendeirismo no municipio chantadino e poñer en valor as paisaxes desde os camiños tradicionais que se fan andando, terá nesta ocasión un percorrido de 12 quilómetros. O prazo para inscribirse remata o xoves, 18 de abril ás 23:59 h en ccnorte.com
Ás 10:00h do día 21 comezarase na adega Castrofiz para iniciar a Andaina pola ribeira de Chantada ata Guxeba traxecto no que a organización vén de recuperar un camiño que estaba pechado, “Creo que vai ser moi bonito para os asistentes poder coñecer novas rutas. Cada ano preparamos sendeiros, marcamos a ruta e despois recollemos todo. Procuramos que non quede marca de ningún tipo, que a xente no tire nada. De feito coas andainas aproveitamos para recoller o lixo que atopamos para que quede todo o máis limpo posible”, asegura Alejandro Méndez, presidente do Clube Atletismo Chantada.
O Concello de Chantada colabora facilitando, entre outras aportacións, os medios de asistencia, “Durante a Andaina contarase co apoio de Protección Civil ante posibles caídas ou torceduras. Os participantes terán aprovisionamento de auga en varios momentos da Andaina e contarase en diferentes puntos da ruta cunha ambulancia para calquera emerxencia”, sinala a concelleira de Deportes, Belén Vázquez.
A seguinte cita que organiza Atletismo Chantada é a Carreira Popular de Chantada que terá lugar o sábado, 18 de maio. Próximamente presentarase o cartel e programa da actividade.
