O QTC25 comeza a súa particular conta atrás anticipando, por parte da organización, o número de inscricións pechadas, as novidades e o deseño das probas. Entre as novidades, preséntanse probas ‘bautizadas’ por diferentes patrocinadores, moitos deles emprendedores locais.
SÁBADO 15 DE FEBREIRO
No Trail do Castelo, os participantes máis expertos e resistentes estrearán a Ultra “Atrium Vitis”, de 83 quilómetros e 5000 m. de desnivel positivo, na que poderán ascender ao Pico Pía Paxaro, gozar das fervenzas máis simbólicas do Xeoparque Montañas do Courel e pasar por pobos singulares como Paradaseca, Rugando, Outeiro, Vilarbacú, A Seara e Paradapiñol. Un percorrido duro e equilibrado, onde se mestura o paso por soutos, viñas, ríos e montañas que transmiten toda a esencia do Courel.
Outra novidade importante é o nacemento dunha nova ultra de 53 quilómetros “Casa de Outeiro”, con 3100 metros de desnivel positivo. Deseñada para aqueles que queren dar o salto da maratón á distancia ultra.
Para os maratonianos manterase o Maratón Casa do Estanco, de 42 quilómetros e 2400 metros de desnivel positivo, co percorrido da pasada edición en sentido inverso que resultou todo un éxito.
O Trail “Fisiosport”, de 29 quilómetros e 1100 metros de desnivel positivo. Unha distancia intermedia que non ten nada que envexar a outras pola súa tecnicidade; apta soamente para os que gusten da auga e do barro.
E pensando nos que empecen neste deporte: o MiniTrail “Bodegas EDV”, de 17 quilómetros e 1100 metros de desnivel positivo, e “A Carreiriña Finca Millara”, de 10 quilómetros e 400 metros positivos, outra das novidades desta edición, na que tamén poderán estrearse corredores a partir dos 14 anos.
Finalmente, e para os andadores, dúas opcións: a clásica Andaina “Coureleando”, de 17 quilómetros, ou a recén chegada ao programa: a Andaina “O Galeirón”, de 10. As dúas comparten os percorridos do minitrail e da carreiriña, respectivamente.
DOMINGO 16 DE FEBREIRO
Para este día estarase xa en territorio “doLor”, onde os e as participantes poderán descubrir os recunchos máis descoñecidos do Courel no Trail de 29 quilómetros, con 2000 m. positivos; no Minitrail de 17, con 1250 m de desnivel positivo, ou estrear tamén a Carreiriña Finca Millara, de 9 quilómetros e 700 m. positivos, a partir dos 14 anos.
A opción de andaina repetirase o domingo tamén polo territorio do Lor coa Andaina “O Galeirón”, de 9 quilómetros e 700 m. positivos, compartindo o percorrido da carreiriña.
INSCRICIÓNS E PREPARACIÓN
Desde a organización do evento transmiten a súa satisfacción polo éxito acadado no primeiro mes con máis de 400 deportistas inscritos. “Que un 26% dos participantes sexan de fóra de Galicia e que un 24% sexan mulleres son datos, sen dúbida, moi positivos que nos ilusionan e animan para continuar traballando con máis ganas aínda; pero, sobre todo, a maior recompensa é o feito de comprobar que, ano tras ano, contamos cun elevado número de fieis participantes que marcan o QTC como cita fixa nos seus calendarios deportivos”, comentan Blas Rodríguez e José Manuel Barreiro, directores da proba.
No que respecta ás persoas inscritas, estas chegan de 24 provincias e 11 comunidades do estado, destacando a presenza de deportistas que virán incluso de Canarias.
Coas tarefas de desbroce xa iniciadas, a organización informa tamén que xa hai percorridos listos xa para adestrar .
