Álvaro Gómez, xogador de bádminton vigués de orixe soberina –na parroquia de Lobios–, acadou esta pasada fin de semana a súa segunda medalla a nivel internacional despois da conseguida o pasado mes de agosto no prestixioso torneo “VICTOR International Jeunes Nouvelle-Aquitaine 2024”.
Ten once anos e apunta a figura deste deporte pola súa progresión e clasificacións que vai acadando en competicións de prestixio. Nesta ocasión, a fin de semana do 2 e 3 de febreiro participaba no Spanish Open Ou15 na localidade malagueña de Benalmádena. Segundo revelan fontes do club Escola Rosalía, Álvaro Gómez acudía a este campionato “co obxectivo de adquirir experiencia pero foi moito máis alá”. E engaden, “malia arrastrar problemas no seu nocello dereito realizou unha gran competición nas tres modalidades e rematou acadando a medalla de bronce na de dobres masculino xunto ao nevense Xoan Balboa”.
Na competición participaban deportistas de gran nivel que defendían nacións como Portugal, Romanía, Xapón, Escocia, Suíza, Ucraína e España.
Ademais deste bo resultado, Álvaro recibiu unha boa noticia ao coñecer que foi convocado pola Federación Española de Bádminton para a Selección Nacional Sub 13 que se concentrará en Madrid do 27 de febreiro ao 2 de marzo baixo a supervisión dos técnicos Lennart Engler (experto danés en formación de base), Salvador Franco (Responsable de Seguimento Territorial de FESBA) e Arturo Ruiz López (Director Deportivo de FESBA).
