Un novo éxito para o Club de piragüismo Quixós de Monforte, nesta ocasión no Campionato Galego de Promesas na modalidade de Slalom onde alcanzaron o segundo lugar por equipos e 6 medallas individuais.
A proba tivo lugar este domingo no curso do río Coura, en Covas, unha freguesía no norte de Portugal, fermosa paraxe e punto de encontro habitual para campionatos deste nivel que organiza a Federación Galega de Piragüismo.
O club monfortino chegou con tan só 4 deportistas pero non foi impedimento para sumar os puntos necesarios que o fixeron subir ao segundo posto da clasificación por equipos, acadando deste xeito o subcampionato galego. Ademais, Sara e Xoel remataron a competición como campións galegos, en K-1 cadete e C-1 infantil respectivamente.
MEDALLEIRO
Sara, ouro en K-1 cadete e prata en C-1 cadete; Martín, prata en K-1 cadete e bronce en C-1 cadete; e Xoel, ouro en C-1 infantil e prata en K-1 infantil.
