O Club de Piragüismo Quixós de Monforte competiu este pasado domingo, día 4 e maio, en terras de Dumbría, concretamente no río Xallas.
Ata alí chegaba con 5 deportistas, 4 homes e unha muller, disputando a Copa Galega de Novas Promesas Slalom. Tras as dúas mangas realizadas o Quixós acadou a segunda praza por equipos, detrás do Club Tea de Mondariz, e por enriba do Club Penedo Teimporta de Tui. Un trofeo que avala o bo comportamento das promesas monfortinas que trouxeron para Monforte seis metais.
As medallas foron por partida dobre para Sara, Martín e Xoel. Sara competía como cadete acadando 2 ouros en C-1 e K-1; Martín, tamén como cadete, gañou dúas pratas en C-1 e K-1 respectivamente. E finalmente, Xoel, outras dúas pratas na categoría infantil nas modalidades de C-1 e K-1.
CONVOCATORIA DA FEDERACIÓN GALEGA DE PIRAGÜISMO
Dous piragüistas do Quixós foron convocados pola Federación Galega de Piragüismo esta pasada semana para unha concentración deportiva a nivel de Galicia en Dumbría do 1 ao 4 de maio, día este último no que se celebrou a competición devandita.
Os deportistas do club monfortino aos que se convidou para facer seguimento deportivo foron Lucas e Xoel.
