Este domingo, 27 de xullo, tivo lugar nas tranquilas augas do Cabe ao seu paso polo Malecón, a 3ª Copa Promoción Slalom da Liga Galega. Na proba participaron uns 85 piragüistas de clubs chegados de diferentes lugares de Galicia como Dumbría, Mondariz, Tui e Tomiño. Competiron nas categorías, masculino e feminino, de Infantil C1, Infantil K1, Alevín K1, Alevín C1, Benxamín K1 e Prebenxamín K1.
O club anfitrión, o Quixós, demostrou que segue estando aí, entre os mellores, tras acadar seis medallas a nivel individual e subir ao caixón dos mellores no segundo posto con 178 puntos. O primeiro posto foi para o Club Teixugos de Tomiño, con 247 puntos, e no terceiro lugar quedou o Club Piragüismo Penedo-Teimporta con 127.
O Alcalde de Monforte, José Tomé Roca, acompañado polo Concelleiro de Deportes, José Manuel Mougán, fixeron entrega das medallas e premios no Paseo do Malecón, a carón do Anchoas.
MEDALLAS INDIVIDUAIS DO CLUB QUIXÓS
Xoel Fernández, que participaba na categoría infantil, foi ouro en C-1 e prata en K-1. Antón Liñares, tamén cun dobrete, na categoría alevín levou dúas pratas: unha en C-1 e outra en K-1. Tamén acadaron metal, Manuel cun bronce en alevín K-1; e Breixo Fernández cunha prata en categoría Benxamín K-1.
