Esta tarde, ás 19:00 h. tivo lugar a presentación oficial das novas instalacións da Piscina Municipal da Pinguela, en Monforte de Lemos. Tras un ano de obras a renovación total das instalacións da Piscina Municipal fíxose en harmonía co Pavillón Polideportivo, reformado hai dous anos logo dunha inversión de 3.708.051,60 €. Ambas conforman agora unha peza única que comparte espazos e envolvente “creando un complexo deportivo único, eficiente e moderno e, sobre todo, óptimo na súa xestión”, en palabras do Alcalde José Tomé.

A xestión conxunta do Complexo Deportivo da Pinguela adxudicouse o pasado mes de setembro á empresa Ideas de Bolina S.L. por un importe de 1.383.821,95 euros, e unha duración de dous anos, prorrogables ata un máximo total de catro. O rexedor subliña que esta reforma integral “dota a Monforte dunha instalación moderna, única e na vangarda tecnolóxica, e supón o colofón dunha transformación completa no conxunto da Pinguela”.

O alcalde agradeceu a colaboración do Consello Superior de Deportes e da Deputación de Lugo na mellora das infraestruturas deportivas de Monforte. Concretamente dixo que “entre as axudas do Consello Superior de Deportes e da Deputación e os investimentos aportados polo Concello nos últimos anos, superamos os 8 millóns de euros en melloras de instalacións deportivas en Monforte”. Na súa intervención, na propia piscina, lembrou –en relación ao importe devandito de axudas– as reformas dos Campos de Fútbol Luis Bodegas e Calasancio, a renovación do terreo de xogo e da iluminación do Campo Municipal de Fútbol de A Pinguela, a renovación da pista polideportiva do Parque da Compañía, a mellora da eficiencia enerxética do campo Luis Bodegas e a instalación de diversos videomarcadores deportivos de última xeración. Investimentos todos eles pensados en potenciar o deporte monfortino.

Ademais do alcalde, tamén interviron na presentación das instalacións, a Subdelegada do Goberno en Lugo, Olimpia López Rodríguez e a Presidenta do CN Monforte, Raquel Escudero.

Reforma integral

A reforma integral da Piscina Municipal foi executada pola empresa Construcciones Castro en base a un proxecto que cambia totalmente a fisionomía do edificio, fusionado agora co Pavillón Polideportivo e conectados ambos a través dunha ampla recepción. A reestruturación total dos espazos mellora e optimiza as circulacións dos usuarios e fai do Complexo Deportivo un espazo moito máis funcional, xa que a recepción dá acceso a calquera dos espazos do centro deportivo: cafetería, piscina, vestiarios e gradas (tanto da piscina como do pavillón), ximnasio xeral, ximnasio de clubes e pista polideportiva.

Ademais, esta reordenación permitiu aumentar a superficie destinada ao ximnasio pasando de 235 m2 a 300 m2; a das gradas, que pasa de 70 a 81 m2, e a da nova cafetería, que ocupa agora 111 m2 e dará servizo a todo o Complexo Deportivo.

A entrada á Piscina sitúase agora na esquina onde conflúe co Pavillón Polideportivo, para crear unha zona de acceso común. Este cambio mellora notablemente a funcionalidade da instalación ao posibilitar un control de acceso previo para ambas infraestruturas.

Os vestiarios, completamente renovados, simplifican os percorridos e separan as zonas de “pés secos” e “pés húmidos”, de forma que os usuarios da piscina e os do ximnasio ou salas de actividades conflúen neste punto, pero sen mesturarse, o que derivará nunha mellora das condicións hixiénicas e sanitarias.

O ximnasio sitúase na zona sur, gañando en superficie e mellorando a súa funcionalidade. Na planta baixa sitúase a recepción e, por detrás desta, dous vestiarios independentes para grupos e un vestiario de persoal, ademais dun despacho para administración.

Completando o conxunto, creouse un núcleo de aseos para o público e unha cafetería que dá servizo tanto á Piscina como ao Pavillón Polideportivo, con vistas aos vasos, e saída directa cara as bancadas tamén reformadas. A cafetería, segundo indicou o alcalde, sairá a concurso en vindeiras datas.