A XUNTA INVISTE 60.000 EUROS NA MELLORA DA EFICIENCIA ENERXÉTICA DO PAVILLÓN DEPORTIVO DE OURAL, EN SARRIA

O delegado territorial, Javier Arias, visitou as instalacións e explicou que se procedeu á substitución da cuberta e o arranxo das carpintarías

Sarria (Lugo), 24 de outubro de 2025.- A Xunta de Galicia destinou 60.000 euros á mellora da eficiencia enerxética e do confort do pavillón deportivo de Oural, en Sarria, a través dunha achega adicional ao Fondo de Cooperación Local, que xestiona a Consellería de Presidencia, Xustiza e Deportes.

O delegado territorial de Lugo, Javier Arias, visitou as instalacións para comprobar o resultado dos traballos. Na zona dos vestiarios substituíuse a cuberta de chapa galvanizada sinxela por outra de panel sándwich de 30 mm de espesor. Ademais, realizáronse labores de limpeza, selado e impermeabilización nas carpinterías exteriores do pavillón.

O Concello de Sarria obtivo o importe máximo da axuda para estas obras que supuxeron reforzar o illamento térmico das instalacións, “co que se reducen o consumo enerxético, as emisións contaminantes e os custos de mantemento”, segundo explicou Arias.

O Fondo de Cooperación Local é o instrumento central de colaboración financeira da Xunta de Galicia coas entidades locais. A maiores, e entre outras, establécese esta liña de colaboración, un fondo adicional que se destina a concellos con poboación inferior a 15.000 habitantes para obras de mellora da eficiencia enerxética en edificios de titularidade municipal utilizados para a prestación de servizos ou o exercicio das súas competencias.

Pavillón Oural / Delegación Territorial