O Boletín Oficial da Provincia publicou o pasado 11 de marzo a convocatoria de axudas de concorrencia para asociacións culturais da Vicepresidencia da Deptuación de Lugo, cun importe total de 600.000 euros. A convocatoria inclúe dúas liñas de axuda: unha para a realización de actividades culturais, dotada con 350.000 euros, e outra para melloras nas instalacións e no equipamento de locais, cun importe de 250.000 euros.
A deputada Iria Castro explicou que “un ano máis reforzamos esta liña de axudas para atender o crecente dinamismo das asociacións culturais e veciñais, unha rede fundamental para facilitar o acceso á actividade cultural e crear espazos de socialización e convivencia arredor da cultura e do patrimonio, especialmente nas parroquias e concellos máis pequenos”. E lembrou que “o importe desta convocatoria incrementouse nos dous últimos anos nun 60%”.
A principal novidade da convocatoria é o incremento da contía mínima dos 500 aos 800 euros, que actualiza a cantidade mínima atendendo ao incremento xeral dos custos tantos dos servizos como dos materiais que as asociacións poden financiar con estas subvencións.
ACTIVIDADES CULTURAIS E MELLORAS EN LOCAIS SOCIAIS
A área de Cultura colabora, por unha banda, na organización de actividades e eventos culturais por parte das asociacións, especialmente aquelas orientadas á difusión do patrimonio material e inmaterial de Galiza, a historia, a música e as tradicións. As axudas oscilan entre os 800 e os 3.000 euros.
E por outra banda subvenciona actuacións de mellora, acondicionamento e reforma de locais e instalacións culturais que os colectivos culturais teñan en propiedade, cedidas ou alugadas. Tamén se subvenciona a compra de equipamento, facilitando así que as asociacións conten cos medios adecuados para as súas actividades culturais. As axudas oscilan entre os 800 e os 2.000 euros.
BASES, PRAZO E DOCUMENTACIÓN PARA A SOLICITUDE
O prazo de presentación de solicitudes abriuse o 12 de marzo e alongarase ata o 26 de marzo, incluído. As bases e modelos de solicitude están dispoñibles na web da Deputación de Lugo.
SUBVENCIÓNS PARA CLUBS E ENTIDADES DEPORTIVAS
A Vicepresidencia da Deputación de Lugo, a través da área de Deportes, vén tamén de publicar o pasado 12 de marzo a convocatoria de axudas de concorrencia para clubs e entidades deportivas. O importe total será de 660.000 euros, 60.000 euros máis que na última anualidade.
Os clubs teñen ata o 27 de marzo para solicitar as subvencións, achegas que irán dirixidas a financiar gastos relacionados coa actividade competitiva como, por exemplo, a compra de material deportivo e equipacións, custos de transporte, fichas, arbitraxe, persoal ou alugueiro de instalacións.
O vicepresidente da Deputación Efrén Castro destacou “o reforzo da convocatoria, cun incremento do 10 por cento nos fondos dispoñibles” e lembrou que se trata “da liña de axudas con maior dotación das que se convocan desde a institución provincial, mostra do compromiso desta administración co tecido deportivo da provincia”.
As axudas oscilan entre os 500 e os 6.000 euros, en función dos criterios sinalados nas bases, referidos ao rendemento deportivo (ascensos de categoría, resultados en campionatos estatais ou internacionais,..), á incidencia social do club (número de licenzas federativas e/ou equipos en relación co número total de cada disciplina), ao ámbito territorial, aos anos de creación da entidade ou ao persoal contratado.
As bases e modelos de solicitude están dispoñibles na web da Deputación de Lugo.
