Estes venres presentouse a XIII Subida a Taboada, que se celebrará o 25 e 26 de abril. A proba organizada pola Escudería Taboada e polo Concello de Taboada, abrirá o calendario do campionato galego de Montaña. A Subida manterá o trazado habitual, nun treito da estrada LU-611, con saída no Cruce das Seixas e chegada en Taboada, na que os pilotos terán que realizar catro pasadas cronometradas.
Efrén Castro reafirmou durante o acto, “o compromiso da Vicepresidencia da Deputación coa proba” e valorou “o traballo realizado desde a Escudería Taboada e desde a área de Deportes do Concello de Taboada para recuperar esta Subida e a aposta por afondar na implicación da veciñanza na carreira”
O concelleiro de Deportes, Cultura e Medio Rural de Taboada, Manuel Diéguez, subliñou que “a Subida se converteu nunha cita ineludibel no noso calendario deportivo” e valorou que a Subida pon a Taboada no mapa do deporte galego. Confirmou ademais que a inscrición dos pilotos da Escudería Taboada será financiada polo Concello de Taboada.
A colaboración da Vicepresidencia da Deputación coa Subida a Taboada encádrase na rede de apoio ao automobilismo que se ofrece desde a entidade provincial con achegas e colaboracións cos rallys de asfalto e montaña que se celebran nas distintas comarcas e cunha convocatoria de subvencións específica para pilotos de rally, cun importe total de 45.000 euros, que se publicará a vindeira semana no BOP.
Subida a Taboada 2026 presentación / Vicepresidencia Deputación
