O torneo que trae á vila do Asma a xogadores de primeiro nivel comezaba este luns pola tarde despois da presentación da que participaron representantes do Círculo chantadino de xadrez como Camilo Rodríguez e Miguel Vázquez, presidente e tesoureiro respectivamente; o alcalde de Chantada, Manuel Lorenzo Varela e a concelleira de Deportes, Belén Vázquez Caseiro, ademais do árbitro do torneo, Ovidio Mario Tallarico e de 6 xadrecistas:
- Petkov Vladimir, Bulgaria 1971, Gran Mestre Internacional de Xadrez
- Docampo Beltrán Dexter, Cuba 1999, Mestre FIDE de Xadrez
- Strikovic, Aleksa, Serbia 1961, Gran Mestre Internacional de Xadrez
- Singgih, Diajeng, Theresa, Indonesia 2004, Mestra Internacional Feminina
- Claverie Raúl, Arxentina 1983, Mestre Internacional de Xadrez
- Chelhod Víctor, Francia 1998, sen titulación internacional
Trátase dun torneo pechado onde o número de participantes está limitado por invitación ou por inscrición. Neste caso son 6 xogadores dun país sen poder repetir nacionalidade e é valedeiro para a norma de Mestre Internacional e a norma de Gran Mestra Internacional Feminina. “A este respecto a única muller participante vén a Chantada para conseguir a norma e o título, mentres o francés busca o seu primeiro título ou o cubano conseguir o Gran Mestre Internacional”, explican desde o Círculo chantadino.
Pola súa banda o alcalde asegura que o torneo dá a posibilidade de que os amantes do xadrez poidan ver o xogo de xente de verdadeiro nivel, como pensan e as estratexias que utilizan, convertindo a Chantada en referente do mellor xadrez do momento.
O Círculo chantadino de xadrez botou a andar a comezos dos 2000 contando con gran afección e moito nivel, cun club en división de honra máis de 10 anos.
