La Vuelta Femenina 2026 sairá dende Monforte este mércores 6 de maio, co cal resultou necesario desenvolver un completo dispositivo de tráfico para garantir que o inicio da 4ª Etapa da proba discorra sen ningún tipo de incidencia.
O Equipo de Goberno e a Policía Local, en coordinación cos responsables de La Vuelta Femenina, “levamos un tempo traballando no deseño dun dispositivo de tráfico que permita o axeitado transcurso do inicio desta proba, que sairá desde a Compañía en torno ás 14.15 horas e percorrerá o centro urbano ata saír da cidade polo Morín”, sinala o Alcalde José Tomé.
4ª ETAPA DE LA VUELTA FEMENINA
Esta 4ª Etapa, Monforte de Lemos-Antas de Ulla, partirá desde a Praza da Compañía arredor das 14.15 horas e percorrerá o Cardenal, Avenida de Galicia, rúa Chantada ata a rotonda do Hórreo, Ronda María Emilia Casas Baamonde, rúa Doctor Casares e Morín completa, saíndo da cidade pola LU-546 en dirección Bóveda e Sarria.
Serán 115 quilómetros que, ademais de Monforte, transcorrerán por concellos como Sarria, Láncara, O Páramo, Portomarín, Taboada e Monterroso. O remate da proba será no Parque Central de Galicia, en Antas de Ulla.
AFECTACIÓNS Á MOBILIDADE
O estacionamento do Parque dos Condes estará pechado ao tráfico desde as 23.00 horas deste luns, 4 de maio e ata completar a saída da carreira sobre as 18.00 horas do mércores 6 de maio.
Na páxina web do Concello de Monforte pódense ver ao detalle as rúas afectadas pola saída da proba o día 6 de maio. Afectacións que se darán dende as 10:30 h. ata aproximadamente as 14:30 h.
