Unha reducida representación do Club Quixós de Piragüismo, que se desprazaba ata terras catalás esta fin de semana con tan só tres deportistas mozos, foi quen de volver para Monforte con 3 medallas.

Os piragüistas que competían no Campionato de España de Xoves Promesas de Slálom e Kaiak Cross eran Lucas Pavón, Antón Liñares e Xoel Fernández. Este último con protagonismo especial pois colgou tres metais: dúas medallas individuais e a outra en equipo na modalidade de ‘Patrullas’.

Lucas Pavón, Antón Liñares e Xoel Fernández subiron ao podio como terceiros na modalidade de piragüismo devandita (‘Patrullas’), mentres que as outras medallas acadadas por Xoel foron unha prata en K-1 Slálom e outra de bronce en Kaiak Cross.

Este domingo 26 de xullo o club monfortino exercerá de anfitrión no tramo do Malecón do río Cabe, lugar onde se disputará unha Copa de Galicia, proba do calendario anual galego.