O Club Pesca Río Cabe vén de colleitar un gran éxito nacional e reafirma o valor da súa Escola de Pesca. Faino grazas ao subcampionato do pescador Lucas Pavón, mozo deportista que ademais foi recoñecido como Deportista de Alto Nivel.
O club monfortino desprazouse días atrá ata terras leonesas para participar no XXIX Campionato de España de Selecións Autonómicas de Salmónidos Mosca Juventud, evento celebrado do 3 ao 6 de setembro nas augas do río Órbigo. A representación do club estivo encabezada polo seu presidente e adestrador, Roberto Martínez Díaz, quen acompañou desde o martes 1 de setembro a Lucas Pavón Sanmartín, integrado na Selección Autonómica Galega. “Lucas completou un campionato impecable que o levou a conquistar o segundo posto e a medalla de prata nacional ao combinado galego”, comentan dende a entidade deportiva monfortina.
RECOÑECEMENTO AO ESFORZO, AO EQUIPO E AO LABOR DE CANTEIRA
O Club Pesca Río Cabe quere salientar con este resultado o traballo do seu presidente e adestrador, Roberto Martínez Díaz, e dos adestradores Elsa, Antonio e Jose no desenvolvemento e éxitos da canteira. A cita no río Órbigo deixou ademais un gran fito para a entidade monfortina co nomeamento oficial de Lucas Pavón Sanmartín como Deportista de Alto Nivel. Unha distinción que supón unha xusta recompensa ao esforzo, adestramento e disciplina do mozo pescador.
Finalmente, tamén sinalan dende o Club que “este éxito pon de manifesto tamén o bo facer e o noso compromiso a través da Escola de Pesca, unha iniciativa fundamental para a promoción do deporte base, a formación de novos talentos e a transmisión do respecto polo contorno natural ás novas xeracións”.
