A II Quiroga Bike Marathon entra na súa recta final con arredor de 190 persoas inscritas e só 10 dorsais dispoñibles. A proba celebrarase este sábado 19 de setembro e ofrecerá dous percorridos de 45 e 65 quilómetros polos sendeiros e paraxes do municipio e da contorna do Xeoparque Montañas do Courel.
A cita deportiva foi presentada este martes 15 de setembro na Casa da Cultura de Quiroga e contou coa participaron do vicepresidente da Deputación de Lugo, Efrén Castro; o alcalde de Quiroga, José Luís Rivera; e membros do equipo de Goberno como o concelleiro de Deportes, Antonio Marcos. Tamén estivo un dos responsables da organización, Celestino González, presidente do Oroso Club Ciclista.
Durante a presentación destacouse a importancia desta proba para a comarca, tanto pola súa dimensión deportiva como pola súa capacidade para promocionar Quiroga, a Ribeira Sacra e o Xeoparque Montañas do Courel como destinos vinculados ao deporte e á natureza.
O evento conta co financiamento e a colaboración do Concello de Quiroga e da Vicepresidencia da Deputación de Lugo.
DETALLES DA PROBA
A proba contará con dúas modalidades: a ‘Bike Marathon‘, que terá un percorrido de 45 quilómetros e 1.300 metros de desnivel positivo; e a ‘Bike Extreme‘, con 65 quilómetros de percorrido e 2.300 metros de desnivel positivo.
Os dous itinerarios discorrerán por carreiros e paraxes do Concello de Quiroga e da contorna do Xeoparque Montañas do Courel combinando zonas rápidas, descensos e tramos técnicos para ofrecer unha experiencia completa ás persoas amantes da BTT.
A saída terá lugar ás 9.00 horas desde a rúa Real de Quiroga, punto no que tamén estará situada a meta, e o peche da carreira está previsto para as 16.30 horas. Ao longo dos dous percorridos haberá avituallamentos sólidos e líquidos, debidamente sinalados no rutómetro oficial.
A participación poderá realizarse de maneira individual ou por parellas e non será necesario contar con licenza federativa. Tamén estará permitida a participación con bicicleta eléctrica, aínda que esta modalidade non contará cunha clasificación específica nin puntuará para a clasificación xeral. A inscrición inclúe bolsa do corredor, seguro deportivo e cronometraxe con chip.
As inscricións pecharanse este mércores 16 de setembro.
SESIÓN PREVIA E AGASALLOS PARA OS PARTICIPANTES
A organización celebrará o venres 18 de setembro, en horario de 20.00 a 21.00 horas e na Casa da Cultura de Quiroga, un briefing previo no que se explicarán os principais aspectos técnicos e organizativos da proba. As persoas inscritas que asistan ao encontro participarán no sorteo de diferentes agasallos, entre os que figuran unhas gafas de Óptica-Audición Alicia Lama; unha cesta de produtos para ciclistas da licenciada Marta de Olano Vela; un pantalón, un casco e un maillot de Valwind; e unha fin de semana en temporada baixa no Xeocamping Montañas do Courel.
O evento conta co financiamento e a colaboración do Concello de Quiroga e da Vicepresidencia da Deputación de Lugo, fundamentais para facer posible a celebración desta proba.
