O Concello de Sober clausurou este domingo 5 de novembro a XL Feira do Viño de Amandi. O acto, realizado no Hotel Pazo de Sober, tivo como anfitrión ao alcalde local Luis Fernández Guitián, quen estivo acompañado da directora de Turismo de Galicia, Nava Castro, e outros representantes públicos de diferentes administracións. O Concello da Peroxa, concello convidado deste ano, estivo representado polo seu alcalde, Manuel Seoane Rodríguez.
Fernández Guitián lembrou a importancia de seguir poñendo o foco nun sector “básico para o noso Concello”, polo que houbo que reinventarse e non deixar pasar esta edición da feira. Insistiu na importancia de apostar polo viño da subzona de Amandi, ou calquera outra da D.O. Ribeira Sacra, durante estas festas e recordou que Sober seguirá adiante este mes coa campaña #Amandízate, coa que o Goberno local pretende “encher de Amandi os fogares e tamén as redes sociais”.
Na mostra deste ano participaron un total de 28 adegas e 55 referencias e a asistencia ao evento foi mediante convite para dar cumprimento as normas sanitarias en vigor e previr contaxios da covid-19.
Viños premiados na XL Feira-Mostra do Viño de Amandi
Categoría de tintos xoves
Cruceiro, Viña Cichón e Viña Mezquita (os tres gañadores).
Categoría de brancos
Finca Cuarta
Premio ás añades doutros anos
Adega A Carqueixa, Garoubas 18.
O panel da cata oficial estivo composto por David Ledo Varela, enólogo de Adega Valdés (Rías Baixas) e membro da Asociación Galega de Enólogos, Cristina Mantilla González, enóloga e profesora do ciclo superior (Escola de Hostalería F. Belarmino Fernández Iglesias), Mayra Ratón Fernández, enóloga, membro da Asociación Galega de Enólogos e membro do panel de cata C.R.D.O. Ribeira Sacra, Luis Díaz, xornalista especializado, Natalia Cid Mayo, sumiller, Grupo Montesequeiro e Manuel Corralero Geanini, sumiller do Hotel Plaza (A Coruña) e membro da Asociación de Sumilleres de Galicia (Gallaecia).
Os premios, unha peza exclusiva de Gundivós, foron entregados polo alcalde de Sober, Luis Fernández, a directora de Turismo, Nava Castro, o director da estación enolóxica de Galicia, Juan Casares, o director xeral de Agacal, José Luis Cabarcos, o deputado da área de participación cidadá, Roberto García e o alcalde da Peroxa, Manuel Seoane.
