Ethel Vázquez Mourelle, conselleira de Infraestruturas e Mobilidade, supervisou as obras da primeira fase a autovía que unirá Nadela con Sarria, e que ten como obxectivo de futuro chegar a Monforte, tras converter a vía r´´apida en autovía na súa totalidade. O avance das obras nesta 1ª fase do tramo Nadela-Sarria permitirá, segundo Vázquez, que a Xunta abra en outubro ao tráfico o tramo desta infraestrutura que “reforzará a seguridade viaria, a calidade de vida e a competitividade de Lugo, tras un investimento de 25 M€”.
A intervención actúa concretamente nos 11,5 quilómetros que conectan A Pobra de San Xiao con Sarria centro, o treito que rexistra maior intensidade de tráfico. As obras supoñen a adaptación dos tres enlaces do treito, A Pobra, Sarria norte e Sarria centro, e a ampliación dos seis pasos inferiores; así como a instalación dun valado reforzado para evitar o acceso de fauna salvaxe.
A conselleira destacou o grande investimento realizado e a puntual marcha das obras malia estar en tempos de pandemia e sufrir a crise de prezos e de abastecemento de materiais, e agradeceu o esforzo dos 50 traballadores que se atopan agora avanzando nestas obras, co emprego de 30 máquinas pesadas sobre o terreo, ademais de pequena maquinaria.
Actualmente, os labores están centrados na extensión das diferentes capas de firme, tendo xa estendido o 75% da primeira delas, correspondente co solo cemento e estando previsto continuar coas seguintes durante os meses de agosto e de setembro.
2ª FASE DO TRAMO NADELA-SARRIA
A conselleira, ademais de corroborar a posta en marcha en outubro da 1ª fase da autovía, adiantou que a Xunta vén de adxudicar a redacción do proxecto do treito que completará a infraestrutura ata Nadela.
Sinalou que en agosto formalizarase o contrato e comezará a redacción do proxecto de trazado, do estudo de impacto ambiental e do proxecto construtivo para a construción da segunda fase da autovía, ao longo de 13,5 quilómetros, entre A Pobra de San Xiao e a conexión coa A-6 en Nadela.
Este traballo, adxudicado por case 270.000 €, ponse en marcha para poder dispoñer xa a mediados de 2023 dun proxecto de trazado para someter a información pública.
