A ampliación anunciada este mércores suporá incrementar o Polígono do Reboredo en 28,7 hectáreas máis (287.400 m2), que é un 77,54% da superficie actual (370.600 m2). José Tomé recordou que recetemente informouse doutra ampliación, grazas á cesión gratuíta que a Deputación de Lugo levou a cabo de parcelas adquiridas para a implantación de Pacadar”. Neste caso actuarase na parte noroeste, ampliando o Polígono en 16,5 hectáreas máis, un 44,50% da superficie actual sinalada.
As dúas ampliacións suman 452.246 m2, esta é unha superficie que superá á actual do polígono en 81.646 m2. Así o Polígono do Reboredo pasará a ter unha superficie duns 823.000 m2, cunha proxección de futuro moi importante”, subliñou o Alcalde.
José Tomé destacou que “para min como Alcalde, con estas actuacións, imos facer aínda máis atractivo o noso Polígono, con máis solo industrial, máis oportunidades para as empresas, mellor comunicado e con mellores servizos para a implantación de empresas, para xerar riqueza e xerar postos de traballo”.
Pola súa banda, o Delegado do Goberno, Pedro Blanco, agradeceu o esforzo e as políticas do Concello que, “pese ao difícil contexto económico derivado da pandemia e a guerra de Ucraína, permitiron xerar un impacto moi positivo no modelo produtivo da provincia.” Monforte, subliñou, ten “a man tendida do Goberno para seguir crecendo, cun proxecto que o continuará potenciando a nivel industrial e asentando a Comarca como un dos principais núcleos de dinamismo empresarial e económico de Galicia.”
Polígono do Reboredo visita Delegado do Goberno / Concello de Monforte
Blanco agradeceu tamén o traballo de SEA e da súa xerente Beatriz Sestayo, “para culminar a esperada ampliación do parque empresarial de Reboredo”. As xestións realizadas tanto desde SEA como desde o Concello permitiron triplicar a ocupación do polígono, que pasou do 20 ao 100% de chan adxudicado en só tres anos, nun “antes e un despois”, segundo a xerente de SEA, froito da nova etapa “proactiva” e de implicación directa iniciada no últimos catro anos. “A acción pública só ten sentido se redunda na creación de emprego, no desenvolvemento económico e no asentamento de poboación”, subliñou Beatriz Sestayo, que sinalou que “A previsión inicial establece que se poidan licitar as obras nun prazo aproximado dun ano”.
Polígono do Reboredo
O actual parque empresarial, no que se asentan empresas como Oviganic, especializada en produtos lácteos ou a farmacéutica Indukern, acolle máis de 30 compañías que xeran preto de 300 empregos directos, segundo as cifras achegadas polo sector empresarial.
Recentemente mellorouse o firme da estrada provincial que vai dende Monforte ó polígono, a LU P-3205, para o que se destinou un orzamento de 315.000€. E nos últimos anos, o concello fixo a nova vía de medio quilómetro construída na zona oeste, cun inventimento de 235.627,16€ e púxose en marcha o Viveiro de Empresas industrial que ten o Concello de Monforte, e no que investiron 235.913,45€.
No período 2016-2022 o concello investiu no Polígono máis de 1,1M€ e recentemente anunciouse unha nova depuradora para o Polígono cun investimento de preto de 5.000.000 €.
