Este programa de investimentos inxecta 25M€ de fondos públicos no tecido socioeconómico da provincia, tendo en conta as achegas dos concellos, que suman case 3M€. O Presidente da Deputación, José Tomé Roca, destacou que é o quinto ano consecutivo que esta ferramenta se aproba no primeiro trimestre do ano, permitindo así aos concellos planificar as súas accións, traballar con máis previsión, aproveitar mellor os recursos e dar unha resposta máis áxil aos veciños e veciñas.”

A Deputada de Economía, Recadación, Facenda e Especial de Contas, Carmela López Moreno,  explicou que os concellos presentaron as súas propostas para investir estes fondos da institución provincial aos diferentes programas: investimentos; Servizo de Axuda no Fogar (SAF); reforzo do emprego; actividades culturais; actividades deportivas; actuacións e eventos turísticos; feiras e mercados; administración electrónica e protección de datos; e protección civil.

Nas peticións das entidades locais teñen prioridade os investimentos, aos que deciden dedicar máis de 16,5M€ -case o 70% do total dos fondos-, para acometer 324 obras e subministracións; seguido da creación de emprego, á que destinan algo máis de 3,6M€ cos que crearán 282 postos de traballo; e do Servizo de Axuda no Fogar (SAF), para o que os concellos de menos de 20.000 habitantes reciben 3,3M€ para atender a unhas 2.000 persoas.

A Deputada incidiu en que o Plan Deputación é “a mellor mostra de que a suma de esforzos, entre Deputación e os Concellos, multiplica resultados. A día de hoxe é unha fonte de recursos fundamental para impulsar o desenvolvemento e a cohesión territorial da provincia de Lugo, a través da dotación, a mellora e o mantemento de servizos e infraestruturas públicos”.