Esta convocatoria supón a maior dotación de axudas Leader xestionada ata o momento polo GDR Ribeira Sacra-Courel, e presenta como principal novidade un marco temporal de tres anos (2026-2028), o que ofrece unha maior marxe para a planificación e execución dos proxectos, facilitando que as iniciativas do territorio se desenvolvan con maior seguridade e estabilidade.
As axudas Leader están dirixidas a:
- Proxectos produtivos, promovidos por persoas físicas ou xurídicas, orientados á creación, mellora ou modernización de actividades económicas no medio rural, que poderán recibir unha axuda de ata 90.000 euros, conforme ao establecido nas normas de xestión do GDR.
- Proxectos non produtivos, promovidos por entidades públicas ou privadas sen ánimo de lucro, que xeren un beneficio para a poboación do territorio.
A convocatoria contempla o Bono Activa Rural, dirixido a persoas que se dean de alta como traballadoras autónomas para o exercicio de actividades económicas non agrarias no medio rural, nos termos recollidos na convocatoria. Esta axuda consistirá nunha axuda económica de 18.000 euros, vinculada ao inicio da actividade e ao cumprimento dos requisitos establecidos nas bases reguladoras.
Na convocatoria Leader anterior, o GDR Ribeira Sacra-Courel financiou un total de 28 proxectos, cun orzamento de 581.069,46 euros, contribuíndo á dinamización económica e social do territorio. O incremento do orzamento dispoñible nesta nova convocatoria permitirá apoiar un maior número de iniciativas, reforzando o impacto do programa Leader no territorio. O prazo para a presentación de solicitudes estará aberto durante dous meses, finalizando o 6 de abril de 2026.
