UFD, a distribuidora eléctrica de Naturgy, levou a cabo unha actuación de mellora da rede eléctrica no municipio de Sarria, cun investimento de 125.000 euros para reforzar o potencial de subministración eléctrica na zona.

A actuación consistiu na instalación dunha nova liña subterránea de media tensión de 325 metros, un novo centro de transformación de 250 kVA e 160 metros de condutor de baixa tensión subterráneo e a reordenación da rede de baixa tensión existente.

“Estas melloras permitirán optimizar o funcionamento da infraestrutura eléctrica, incrementando a capacidade da rede e mellorando a calidade e continuidade da subministración para os veciños e negocios do municipio“, explican dende UFD.

O delegado de UFD na provincia de Lugo, Jorge Mato destacou que “esta actuación reflicte o compromiso da compañía coa mellora continua da calidade da subministración eléctrica, mediante investimentos que contribúen a reforzar a fiabilidade da rede e o desenvolvemento dos municipios”.