A conselleira do Medio Rural destacou que 41 proxectos se benefician desta liña de achegas, cun investimento de 2,1 millóns de euros, para favorecer a diversificación económica do rural e a fixación de poboación. A empresa de Taboada conta cunha achega de case 50.000 euros para a adquisición de maquinaria de maior capacidade e rendemento, integrándoa no proceso produtivo do obradoiro de xeado artesán que comercializan baixo o nome de Xeou!. Neste sentido, puxo en valor que esta empresa é un exemplo de aposta pola transformación e por xerar valor engadido no sector lácteo.
Ao mesmo tempo, salientou que a través destas axudas para actividades non agrícolas, as empresas beneficiarias están consolidando 474 postos de traballo e comprometendo a creación de 39 novos. Na última década estas axudas beneficiaron a preto de 550 empresas galegas, cunha achega de máis de 23 millóns de euros. Así, engadiu que isto permitiu crear case 500 empregos e consolidar máis de 4.320 postos de traballo na nosa comunidade.
As axudas están dirixidas a pequenas empresas situadas en zonas rurais e a persoas físicas que residan nestas contornas, e financian proxectos que contribúen ao desenvolvemento de actividades en ámbitos como a produción de bens e materiais, a transformación e comercialización de produtos agrarios ou a prestación de servizos, entre outros.
SAT Seixas
A empresa SAT Seixas está localizada no concello de Taboada cunha gandaría propia que apostou pola diversificación e posta en valor da súa produción láctea a través do xeado artesán, Xeou!. Ademais, está adherida ao selo da Consellería do Medio Rural de Artesanía Alimentaria, sendo exemplo dun traballo que fan desde o coidado e de xeito totalmente artesanal.
