A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, visitou este xoves as instalacións de Aceiroga, en Quiroga, onde salientou a aposta desta empresa polas novas tecnoloxías e pola mellora da súa capacidade produtiva, o que redunda nun incremento da calidade do seu produto.
Entre outras axudas, a empresa beneficiouse tamén dunha achega do Leader, a través da cal puido adquirir unha nova almazara para a elaboración de aceite, o que permitiu ampliar a súa capacidade de produción.
A conselleira puxo en valor a aposta do seu departamento por estas achegas, que favorecen o desenvolvemento rural e diversifican o seu tecido socioeconómico. Deste xeito, salientou que a convocatoria 2026 das axudas para proxectos en actividades non agrícolas se resolveu cun orzamento de 2,1 millóns de euros, a través dos que se apoiarán a 41 proxectos. Isto permitirá consolidar 474 postos de traballos e crear 39 novos empregos.
Ademais, Gómez resaltou que na última década se mobilizaron máis de 23 millóns de euros mediante estas axudas, beneficiando a preto de 550 empresas galegas. Ao mesmo tempo, isto permitiu crear 500 empregos e consolidar 4.320 postos de traballos.
