Adif vén de aprobar a licitación do contrato de execución das obras de reparación de 11 desmontes situados no tramo Monforte de Lemos-Ourense, na liña ferroviaria Monforte-Vigo. Os traballos centraranse en tramos que abarcan os municipios ourensáns da Peroxa, Coles e Ourense.

O investimento total do contrato de licitación alcanza os 3.824.988,20 (IVE incluído) e conta cun prazo de execución de 13 meses para reforzar e reparar 11 desmontes, co obxectivo “de mellorar a seguridade e estabilidade na infraestrutura ferroviaria”, sinalou Adif.

Así mesmo, esta entidade pública dependente do Ministerio de Fomento informa que as actuacións realizaranse principalmente na banda de mantemento da liña co cal a afectación ao servizo ferroviario de viaxeiros será mínima ou inexistente.