Sempre é de agradecer atopar novas que alentan ao optimismo e que nos lembran que a ilusión e a innovación son a semente de calquera proxecto que queira alcanzar o éxito. Unha mostra do anterior atopámola en Taboada, grazas á primicia que nos contou Diego Villar, CEO da empresa CM Stores & Innovative Bussines SLU.
O impulsor de Comercial Mida na súa actual etapa explícanos que a principios de 2021 teñen intención de lanzar “o primeiro marketplace español creado para calquera empresa, pero sobre todo pensado para Pymes ou MicroPymes que queiran dar o salto online”. Coñecedores da crise do pequeno comercio, e vendo os bos resultados que están obtendo na xestión da venda online de Comercial Mida, pensaron en aplicar os seus coñecementos para axudar a emprendedores que queren saír adiante abrindo os seus negocios ao mundo.
“O primeiro marketplace español creado para calquera empresa, pero sobre todo pensado para Pymes ou MicroPymes que queiran dar o salto online”
“Cando queres empezar no mundo online as dúbidas que asaltan a cabeza son moitas, polo que queremos crear unha plataformas sinxela, sen as complicación de Marketplaces estranxeiros como Amazon ou Ebay. Plataformas que aínda tendo presenza en España teñen outra mentalidade e procesos de xestión que distan moito das necesidades dun pequeno comercio que quere explorar novas alternativas de crecemento”, comenta Diego Villar.
Trátase, pois, dun gran centro comercial virtual que permitirá que pequenos comercios poidan vender os seus produtos sen asumir riscos nin custes iniciais como poden ser a creación de páxinas web -aloxamento, mantemento, etc-, o posicionamento ou incluso cotas fixas que cobran outros marketplaces por entrar. A nova plataforma nace coa vocación de colaborar co pequeno comercio para impulsar as súas vendas, “nós non imos ganar nada se o cliente non gana nada”, di Villar deixando claro que só existirá beneficio para a empresa se o vendedor asociado ten beneficio. E algo tamén moi importante, a plataforma web comercial creada atraerá a gran potencial de clientes coa garantía dunha compra segura e cun amplo catálogo de referencias de todo tipo.
Diego Villar: “Nós non imos ganar nada se o cliente non gana nada”
CM Stores pon a estrutura, o escaparate virtual para que pequenos comercios e empresas poidan subirse ao carro de internet, e estes tan só terán que rexistrarse, publicar os produtos que desexen vender e ocuparse do proceso de post-venda. Como garantía de confianza Diego Villar remítenos aos 15 anos de experiencia traballando no e-commerce e lembra tamén que o ‘modelo Comercial Mida’ avala o éxito desta estratexia de venda online.
O PROXECTO EN TRES SINXELOS PASOS
1-O cliente final atopará diferentes comercios coas súas ofertas na web de CM Stores e formalizará a compra xa a través da mesma plataforma.
2-A plataforma de venda online comunicará a venda ao comerciante e faralle o ingreso da operación tras descontar a comisión correspondente.
3-O comerciante ou praceiro deste mercado virtual encargarase do proceso de post-venda, envío do produto e trato ao cliente.
O equipo de CM Stores, co seu centro operativo de Taboada, está ultimando detalles de toda a loxística que hai detrás da futura plataforma web esperando anunciar o nome e empezar a funcionar a principios de 2021. Este marketplace ‘made in Galicia’, con previsión de dar cobertura a nivel nacional, permitirá incluso aumentar o equipo de traballo nos vindeiros meses.
