Na moción que defenderán os concelleiros do Grupo Municipal Popular pídese ao goberno local mellorar de forma urxente os problemas de falta de presión de auga e os cortes que están a sufrir todas as empresas, así como rematar a depuradora e poñer en servizo o aparcadoiro, sempre antes do remate do presente mandato.

Os populares sinalan que son moitas as empresas que precisan, para o desenvolvemento da súa actividade, o correcto funcionamento da auga, pero “unha rede de abastecemento da auga correcta é importante para calquera empresa, independentemente de que unhas precisen máis auga ca outras”.

A depuradora é outro dos puntos conflitivos, “Recentemente aprobouse no pleno unha nova prórroga do remate das obras por non ter previsto unha serie de execucións necesarias no proxecto de inicio, que agora é necesario facer. Esta demora dana gravemente os intereses das empresas”, lamentan.

Ademais destes servizos básicos, consideran fundamental facilitar o acceso e abrir o aparcamento polo que piden que se inste ao Ministerio de Transportes a colaborar na mellora dos accesos a este polígono industrial. “O acceso desde a Nacional 120 non está correctamente sinalizado, faltando iluminación e cun firme de acceso deteriorado polas continuas roturas de abastecemento da auga”, denuncian.