O concepto “Slam Poetry” soaralle a chinés a moita xente pero está conseguindo achegar a poesía ao pobo, e sobre todo á mocidade, dun xeito máis ameno baixo este formato de competición poética a micro aberto.

Aínda que o formato naceu polos anos 80 nos EE.UU. en España haberá uns dez anos que se coñece e a partir de aí está a chegar a diferentes cidades, sendo Compostela unha das máis activas actualmente a nivel de Galicia. De feito, a final do Slam España do ano 2022 celebrouse alí a finais de outubro cun Teatro Principal cheo de xente. Como curiosidade, un dos participantes nesa final foi Xosé Casar, veciño de Rubián e retornado de Catalunya.  Competiu representando a “Llobregat Slam Poetry”, de Sant Boi de Llobregat.

Agora, grazas a Xosé Casar, Bóveda pretende entrar no circuíto de ‘Slam Poetry’ co reto de ser a primeira sede asentada no rural. O 25 de marzo será o primeiro encontro e celebrarase no Centro Sociocultural ás 19:00 h.

Quen é Xosé Casar?

Nacín en Ribas Pequenas, en 1957. Vivín, eu e máis dous irmáns máis novos, cos avós maternos, en Ribas, mentres meus pais estaban a traballar en Catalunya. Cando tiña uns 8 anos leváronnos a Barcelona. Aló estudei, traballei, casei, tivemos fillos, e aló vivín ata que me xubilei despois de máis de 30 anos de facer de taxista… e viñemos vivir a Rubián.

Que é KulturN’aldea?

KulturN’aldea é o nome que lle demos ao noso grupiño. Un grupo que formamos para organizar o Slam en Bóveda e outros eventos relacionados coa poesía. Non é unha asociación cultural formal, aínda que non descartamos constituíla cara o futuro.

Para aqueles que lle soe a chinés o de ‘Slam Poetry’, en que consiste este tipo de encontros?

É un torneo de poesía escénica e oral, pero cunhas características especiais: O poema ten que ser de autoría propia, o poeta non pode facer servir atrezzo, o poema non pode pasar de tres minutos e o público vota.

A asociación Slam España engloba máis de 30 sedes de slam, nós queremos inscribir a nosa como Bóveda Slam Poetry (en Slam España xa están informados) e organiza cada ano un campionato. Este ano pasado foi en Santiago de Compostela que é ata agora a única cidade con sede no circuito oficial Slam España, “Poetry Slam Compostela”. Bóveda Slam Poetry será a primeira no rural, tódalas sedes adoitan estar en cidades de máis poboación.

“A asociación Slam España engloba máis de 30 sedes de slam, nós queremos inscribir a nosa como Bóveda Slam Poetry”

Para poder inscribirse no circuíto oficial, Slam España esixe ter feitos como mínimo 6 combates na tempada. Nós farémolos en marzo, maio, xuño, setembro, outubro e unha gran final en novembro.

Na gran final de novembro participarán os gañadores de cada un dos combates anteriores e o mellor segundo posto da temporada, 6 poetas. O gañador terá a posibilidade de participar no campionato de Slam España, pero iso será na tempada de slam de 2025, xa que non poderemos inscribirnos até ese ano.

Como xurdiu a posibilidade de organizar un Slam Poetry en Bóveda?

Dende que coñecín esta modalidade de poesía escénica fun espectador asíduo e participei nalgún slam. En máis dunha ocasión no “Llobregat Slam Poetry”, sede de Slam da cidade onde residía, Sant Boi de Llobregat. No último que puiden participar resultei gañador e clasifiqueime para a Gran Final do Llobregat Slam Poetry. Xa residía en Rubián cando se celebrou e viaxei a Sant Boi. Tiven a sorte de gañar a final e participei, representando a Llobregat Slam Poetry, no Slam España que se fixo en Santiago dentro do Festival Luz poética. Foi unha experiencia impresionante ver o Teatro Principal cheíño de xente agardando o recitado dos poetas.

Xa tiña pensado que sería moi bonito constituír unha sede de slam no concello onde nacín e achegar esta disciplina de poesía escénica ao rural. Propúxenllo a algunhas persoas e decidimos encetar esta aventura.

Ademais dos poetas titulares para o 25 de marzo, anotáronse máis persoas?

Foi algo complicada a difusión do evento. Primeiro porque, a pesar de ser algo que se leva facendo xa hai uns 10 anos, aínda non se divulgou bastante esta disciplina e non é moi coñecida fóra de núcleos urbanos de gran poboación. Tivemos que intentar dar a coñecer o Bóveda Slam Poetry e o combate do mes de marzo no medio dunha enorme intensidade de movemento cultural arredor do Entroido. Así que, aínda que se chegaron a anotar xusto os poetas que precisamos para o noso slam (7 para cada un) e máis un reserva, estamos contentos co resultado e agardamos que vaia aumentando para os vindeiros.

Cres que a poesía pasa por un bo momento ou falta moito por facer para darlle máis visibilidade e achegala a todos os públicos?

A poesía está, segundo a miña percepción, nun bo momento. Hai moita xuventude que cada vez achégase máis, e esta forma que se representa no slam é moi atractiva. Unha mostra diso é o que dixen antes, ver o Teatro Principal de Santiago cheo de xente agardando ver e ouvir poesía. Outra cousa é ter a capacidade suficiente para divulgar este tipo de eventos, pero penso que os medios de comunicación estanse implicando cada vez máis nisto.

“Hai moita xuventude que cada vez achégase máis, e esta forma que se representa no slam é moi atractiva”

O slam está chegando tamén a ensinanza. En cada vez máis institutos, fanse talleres de poesía escénica cos alumnos dando moi bos resultados.

Como contribúen este tipo de eventos a ‘perderlle o medo’ ou ‘a achegarse sen prexuízos’ á poesía?

Algunha veces convidei algún amigo a vir ver un Slam. A verdade é que a súa primeira reacción ao saber que se trata de poesía non é de moito entusiasmo. Cando lle explico en que consiste, xa se mostra máis interesado, cando sae do Slam pregunta cando se fai o próximo.

O Slam é un evento no que participan tanto os poetas coma a organización coma o público. Non se percibe separación entre o público e os slamer, máis ben vense coma cómplices e séntense moi preto no transcurso do acontecemento.

“Un motivo principal do noso Slam é achegar esta disciplina poética ao rural”

Este primeiro encontro será en Bóveda. Tedes pensado xa onde serán os seguintes?

Como dixen, o Bóveda Slam Poetry pretende ser sede oficial inscrita na organización Slam España polo que, se non hai algún motivo extraordinario, sempre se fará no concello de Bóveda. Outra cousa é que poidamos facer os slam en centros distintos. Por agora temos a colaboración do concello que aporta o espazo no centro sociocultural, pero non descartamos facelo noutros centros dentro do concello. Un motivo principal do noso Slam é achegar esta disciplina poética ao rural.