O peche da Panadería de Carude, no barrio do mesmo nome, caeu como un xerro de auga fría entre os e as monfortinas. Outro negocio carismático, cunha traxectoria centenaria, de gran prestixio, e caracterizado pola calidade da materia prima e o seu servizo ao cliente, anunciaba que o 29 de setembro pecharía por xubilación.
As reaccións non se fixeron esperar e moitísimos clientes están a pasar estes días para facer as súas derradeiras compras e despedirse. “Están vindo moitos clientes chorando, é moi emocionante”, dinos Felipe Grande, o panadeiro que rexenta dende os 18 anos o negocio xunto coa súa muller Josefa López. E non só iso, algúns estanlles traendo incluso agasallos, orquídeas e botellas de champán, entre outras cousas.
Ademais da clientela, moitos medios de comunicación como o noso están chamando ou pasando por alí para entrevistalo: La Voz de Galicia Lemos, El Progreso, Onda Cero, a Radio Galega…
“Están vindo moitos clientes chorando, é moi emocionante”
PANADERÍA DE CARUDE
O forno de Carude seica supera os cen anos de historia, mais son 75 os que de forma ininterrompida leva funcionando da man do matrimonio formado por Antonio Rodríguez e Josefa López, primeiro; e coa súa filla, Josefa Rodríguez López, e o marido desta, Felipe Grande, despois.
Felipe cóntanos que entrou no negocio con 18 anos, e para levalo con Josefa, quen literalmente “o levou ao forno”, dinos con retranca.
En todos estes anos, a panadería fíxose cun nome no barrio de Carude pero tamén fóra del. Un prestixio ben gañado grazas á calidade da materia prima, ao pan de trigo e centeo, ás súas bicas e empanadas, ás tortas de chicharróns e ao servizo ao público cun amplo horario de apertura e o forno a disposición para asados.
PANADEIRO, UN OFICO MOI SACRIFICADO
Felipe recoñece que o traballo de panadeiro é moi duro, “sempre traballamos moito pero nos momentos de festa é cando máis traballo había”, e moi sacrificado, “para min as comidas familiares foron moi contadas, e perdín de ir a moitas festas coas fillas…”.
“sempre traballamos moito pero nos momentos de festa é cando máis traballo había”
“Houbo xente que me dixo que así facíame rico, pero eu sempre o fixen por profesionalidade e por atender e dar servizo á miña clientela… e non por amasar cartos”, comenta tamén. Déixanos claro tamén que a relación e o trato coa xente é esencial neste negocio pois cada cliente é un amigo.
Preguntámoslle que sorte correrá este oficio e di que ao xeito tradicional de facer pan non lle ve gran futuro, pero afirma que “querendo traballar, o de panadeiro é un gran negocio”.
“CHEGOU A HORA”
Con este título, a Panadería de Carude agradece o agarimo e a confianza da clientela, dos veciños do barrio e do resto de Monforte o vindeiro 29 de setembro, data na que se xubila Felipe Grande.
A partir das 19:00 h. convidarase de balde a empanada, bica e viño a clientes, amigos e veciños na Praza de Carude. Ademais, o evento estará amenizado cunha actuación musical.
Segundo nos explica Felipe, “a idea de facer unha festa foi nosa e axudaranos a Asociación de Veciños”.
