O Colectivo Vermú de Monforte, autoconsiderado como “almacén cultural”, é unha asociación de Monforte que desenvolve actividades culturais na cidade. Ademais de por organizar o Mercadiño Solidario de Nadal no Club Fluvial de Monforte, son coñecidos por impulsar outros eventos que foron: “Salvemos A Fraternal” ou “San Xoan nos Chaos”.
Un propósito complementario ao de dinamizar Monforte con actividades culturais é, segundo din, “darlle vida aos barrios e espazos que caeron no esquecemento e a axudar, na medida do posible, a determinadas causas ou colectivos”. E tampouco podemos esquecer que os eventos que impulsan teñen enfoque participativo e solidario pois os fondos que se recadan nas actividades van sempre para unha boa causa.
Este Nadal, repiten colaboración co Club Fluvial de Monforte para levar a cabo o II Mercadillo Solidario de Nadal, que se realizará este sábado 21 de decembro de 11h a 21h. Haberá máis de 40 postos de artesanía, libros, segunda man, comida e bebida.
Novamente cun enfoque solidario, a recadación nas entradas (donativo de 1€/entrada, menores de 16 anos gratis), e na cuota dos expositores (donativo de 4€ por posto participante) serán íntegramente doados a asociacións de carácter asistencial que ofrecen os seus servizos en Monforte: Cruz Roja, Auxilia, Ruliños, Cáritas, Afamon e Albores. Faranse tamén dous Bingos Solidarios, Bingo tradicional e Bingo Musical, con agasallos doados polo comercio e empresas locias de Monforte. Os fondos recadados serán destinados a SOGAPS, (Solidaridade Galega co Pobo Saharaui), unha ONG que trata de dar visibilidade á causa do pobo Saharaui en Galicia e axuda na medida do posible ao seu pobo.
Coñecemos máis polo miúdo as orixes e a filosofía deste colectivo da man de Candela, unha das activistas.
Cando se pode dicir que naceu “Colectivo Vermú”?
Naceu no outono do 2023. O noso primeiro evento foi o Mercadillo solidario de Nadal no Club Fluvial de Monforte ese ano.
E con que obxectivo, ou para cubrir que demandas ou carencias dos movementos asociativos xa existentes?
O obxectivo da asociación é o de promover actividades culturais en Monforte que botamos en falta. E de paso que estas sirvan para darlle vida aos barrios e espazos que caeron no esquecemento e a axudar, na medida do posible, a determinadas causas ou colectivos.
Funcionades como asociación, fundación, plataforma… ?
Somos unha asociación pero aínda non puxemos en marcha a captación de socios. Estamos vendo como facelo.
Canta xente forma parte de Colectivo Vermú actualmente?
De momento polo grupo de amigos e voluntarios que participamos na organización dos eventos. Pero estamos vendo como abrila a todo aquel que queira formar parte.
É tan difìcil como se di atopar xente voluntaria e comprometida para a dinamización social? Quizás sexa a falta de tempo o maior problema ou falta motivación e ilusión por cambiar ou mellorar o mundo?
No noso caso que facemos eventos culturais e de lecer non é tan difícil. Os voluntarios pasámolo ben. Penso que é máis complicado noutros sectores non tan agradecidos que requiren un certo desgaste emocional.
Actividades destacadas que tedes feito ata agora?
Fixemos o Mercadillo solidario de Nadal o ano pasado, no Club Fluvial de Monforte, que repetimos este sábado. Tamén fixemos o festival ‘Salvemos a Fraternal’ para recaudar fondos para axudar a esta histórica sociedade recreativa do Barrio da Estación. E organizamos a tradicional festa de San Xoan do Barrio dos Chaos ante a falta de veciños que a puidesen organizar. E por último, fai pouco, organizamos un Bingo Solidario para recaudar fondos para as vítimas da dana de Valencia.
Repetides a organización do Mercado de Nadal no Club Fluvial de Monforte despois do éxito do ano pasado. Cando será e como se presenta nesta ocasión?
Será este sábado 21 de decembro de 11h a 21h. Teremos máis de 40 postos de artesanía, libros, segunda man, comida e bebida. Ademais, tamén haberá moitas actividades e música ao longo do día. Para os cativos: Obradoiro infantil, visita de Papá Noel e contacontos. Teremos DJs e Micro aberto para a sesión vermut e Bingo Solidario para a hora do café. E pechamos co concerto de Dinosaurios e o Bingo Musical.
Proxectos de cara ao 2025?
Hai varias cousas en mente pero aínda nada en firme. Si nos gustaría facer un evento similar ao mercadillo de cara a primavera. Pero aínda estamos buscando ubicación e definindo o formato.
ESPAZOS E HORARIOS DO II MERCADIÑO SOLIDARIO DE NADAL
11:00-20:00 h. Mercadiño
PÉRGOLA
11.30-12:30 h. Micro aberto
12.30-15.30 h. Sesión Vermut: Dj Midori y Dj Albanta
18.00 h. Jaunx
19.00 h. Concerto de Dinosaurios
20.00 h. Bingo musical
BAR
11:00-13:00 h. Visita de Papa Noel
11:30-12:30 h. Obradoiro de Manualidades (Trasnos)
15.30-17:30 h. Bingo
18:00 h. Contacontos Musical coa “A Apalpadora” (Velaísca)
