O proxecto de Rubén Gutiérrez, coñecido artisticamente como ‘Peitoescuro’, segue avanzando. O pasado 18 de maio tivo lugar a pre-estrea o seu segundo sinxelo e video ‘Metamorfose‘ na primeira edición do festival “FICA!”, que tivo lugar no Castro Art Village (Concello de O Saviñao).
Este innovador festival autoxestionado de cinema e arte presentou un atractivo e amplo programa de actividades cun enfoque reivindicativo do rural como espazo de vida e de creación. No transcurso do mesmo houbo proxeccións cinematográficas, táboas redondas, performances teatrais e música. Actividades entre as que figuraba a proxección dos dous primeiros traballos audiovisuais de Peitoescuro, que serviron tamén de aperitivo para un espectáculo musical en directo no que Rubén estivo acompañado de María Rojo.
Ademais da pre-estrea no Saviñao, Rubén Gutiérrez estivo días atrás de convidado no programa ‘ZigZAg’ da Televisión de Galicia onde aproveitou para falar de “Metamorfose”, do camiño cara o álbum que poña remate á triloxía e da súa presenza o sábado 6 de xuño no Festival Millo Verde na praia de Cesantes en Redondela. Na entrevista adiantou tamén que a terceira e última peza da triloxía, chamada ‘Pan das pedras’, previsiblemente lanzarase a finais deste verán.
METAMORFOSE
Trátase do segundo capítulo da triloxía audiovisual coa que Rubén Gutiérrez vai construíndo a liña estética do que será o seu primeiro álbum de estudio: ‘Semente na Fenda’. O artista pretende definir o imaxinario do seu proxecto musical ubicado nos sendeiros que conectan a Ribeira Sacra e a Serra do Courel, envolto nunha natureza misteriosa e potente que acompaña cada movemento do seu protagonista.
A peza audiovisual está dirixida por Álex Baena e conta coa produción de Iago Pico, unha produción que resulta “moito máis ambiciosa que o primeiro capítulo da saga, conseguimos que a trama evolucionara hacia lugares aínda máis suxerentes” afirma Rubén Gutiérrez. “A canción é un alegato en defensa pola vida rural, queríamos que os elementos naturais que rodean as aldeas cobraran vida”, engade.
A estrea oficial en todas as plataformas foi o pasado 23 de maio. Aquí o videoclip:
SEMENTE NA FENDA
Este será o título do álbum de estudio no que Peitoescuro explorará artísticamente “a escuridade necesaria para enraizar e espertar do letargo en busca da luz” e cuxo lanzamento terá lugar a principios do vindeiro ano. O consolidado produtor compostelán e colaborador habitual de Tanxugueiras, Iago Pico, comandará a produción musical deste traballo que, a entender do grupo de traballo, “xerará gran expectación entre público e promotores”.
