O Colado do Vento é unha asociación cultural de Proendos, no Concello de Sober, que conta cunha dilatada traxectoria impulsando accións culturais para poñer en valor o patrimonio local. Este ano celebran o XX aniversario da súa fundación e tamén da actividade máis senlleira que organizan: “Encontros á luz da lúa”.
Segundo sabemos, tras conversar con Paula Vázquez Verao –vicepresidenta da entidade–, O Colado do Vento naceu hai 20 anos co obxectivo de reivindicar os espazos de patrimonio do concello e facer actividades de xeito colectivo. “Naquel tempo estaban abandonados os petróglifos e o patrimonio de Sober”, comenta.
Ao fundarse a entidade empezaron 12 persoas mais despois foise sumando xente, sobretodo de Sober mais tamén da contorna e incluso de concellos máis afastados como A Rúa. A día de hoxe hai preto dos 120 socios e socias e o presidente actual é Óscar Alonso, coñecido tamén por ser compoñente do grupo de música Os Parentes.
A día de hoxe hai preto dos 120 socios e socias e o presidente actual é Óscar Alonso
ORGANIZACIÓN DE ACCIÓNS CULTURAIS
Paula Vázquez explícanos, en relación á dinámica de traballo, que a Xunta Directiva adoita ter reunións cada dous meses e que organizan diferentes actividades repartidas ao longo do ano. A actividade que quizais teña máis repercusión é “Encontros á luz da lúa”, en agosto, mais tamén destacan outras como charlas, roteiros ou viaxes para coñecer Galicia. Programan estas excursións para coñecer patrimonio cultural, histórico e natural doutros concellos e ao mesmo tempo xerar intercambios con asociacións locais dos lugares visitados.
Cómpre salientar tamén o importante labor que realizan na divulgación do patrimonio. Neste apartado hai varias accións interesantes que desenvolven: por unha banda, buscar por parroquias os elementos patrimoniais que hai para visibilizalos e poñelos en valor; e por outra preservar e dar a coñecer a tradición oral. Neste último eido teñen publicados 3 folletos nos que se poden atopar lendas, contos e tradicións en xeral.
Outra actividade interesante, e que comezaron neste 2026, foi o obradoiro de pandeireta. Participaron unhas 30 persoas e a intención é que se repita para o novo curso.
‘ENCONTROS Á LUZ DA LÚA’
Esta é a actividade máis senlleira e lonxeva do Colado do Vento. A primeira edición foi no 2006 e a idea partiu dunha conversa co músico local Álex Llano. De aquí naceu o proxecto de facer concertos de pequeno formato e carácter intimista en puntos do concello nos que houbese petróglifos ou miradoiros.
Nesta longa traxectoria da actividade, que se centra na música e a poesía, Paula lembra que “neste encontro tivemos a artistas como as Tanxugueiras ou Fillas de Casandra antes de ter a sona que teñen hoxe”. Refire tamén a vicepresidenta da asociación que esta cita cultural caracterízase pola interacción, podendo a xente asistente participar con algunha proposta musical ou poética, e polo ambiente íntimo no que o silencio e a atención do público asistente é fundamental.
“neste encontro tivemos a artistas como as Tanxugueiras ou Fillas de Casandra antes de ter a sona que teñen hoxe”
Para a cita deste ano, que será este sábado 1 de agosto, pensouse no lugar de Cadeiras. Na zona de pendellos desenvolverase o programa que acollerá a partir das 22:00 h as actuacións de Leni Pérez (voz) e Roberto Comesaña (acordeón), a poesía de Carlos Rafael e a música de Aldara Pérez (frauta). O público poderá participar con algunha achega musical ou poética se o desexa.
‘Encontros á luz da lúa’ conta coa colaboración institucional do Concello de Sober e da Área de Cultura da Vicepresidencia da Deputación de Lugo.
