Durante a mañá do luns día 10 mantívose o tráfico de peóns e vehículos cortado na Ponte Vella de Monforte. Esta medida tomouse ante os traballos de limpeza da vexetación superficial desta estrutura, que se desenvolveron dende as sete e media da mañá ata a mediodía, aproximadamente.
As tarefas consistiron no corte da maleza e das herbas que agromaron na ponte durante varios meses. Os encargados de levar a cabo este acondicionamento foron as brigadas de parques e xardíns, que precisaron dun guindastre. Foi precisamente esta maquinaria a que obrigou a clausurar o tráfico.
A limpeza da Ponte Vella vai na liña dos traballos de acondicionamento da lagoa do Parque dos Condes , levados a cabo o 3 de xuño. O alcalde de Monforte, José Tomé, resaltou que a ponte “forma parte da imaxe da nosa cidade e por iso debemos mantela nas mellores condicións”. Tamén manifestou a súa vontade de eliminar o tráfico de vehículos da mesma e convertela nunha vía peonil.
