A Asociación Amigos do Folión organiza unha interesante xornada cultural na que se expoñerán tres temas sobre os que falarán persoas de diferentes ámbitos compartindo coñecemento e aportando a súa visión sobre eles.
O escenario para este foro é o Auditorio Municipal do Concello de Chantada e o acto inaugural terá lugar ás 10:30 h. para comezar a xeira ás 11:00 coa conferencia inaugural “La fiesta como patrimonio inmaterial” a cargo de Honorio Velasco Maillo, catedrático de Antropoloxía Social e Cultural da UNED.
Tras unha breve pausa-café de 12 a 12:30 h. desenvolverase a primeira sesión, na que os interviñentes falarán sobre “Patrimonio inmaterial: manifestacións culturais con carro tradicional”. Xunto con Guillermo Rodríguez, da Asociación Amigos do Folión, contarán a súa experiencia na recuperación etnográfica da tradición dos carros a Asociación del Carro Típico Leonés que organizan a festa dos “Carros engalanados de León” e xente da Ronda “La Esperanza” -de Requejo (Cantabria)- que falarán sobre o “Desfile de carretas de Reinosa”. A sesión matinal rematará coa actuación desta Asociación de Cantabria. Nesta Mesa 1 modera Xavier Viana, da Asoc. Amigos do Folión.
Xa pola tarde, ás 17:00 h. retomarase a actividade coa Mesa 2 que leva por título “Patrimonio na Paisaxe Cultural da Ribeira Sacra”. Un oleiro, unha guía do románico, un fotógrafo e un investigador amosarán o seu punto de vista sobre o tema moderados polo Director do Ecomuseo de Arxeriz, José A. Quiroga.
Ás 18:15 h. farase un acto homenaxe aos socios fundadores da Asociación Amigos do Folión.
A última sesión do día chegará ás 18:30 h. baixo o título “Cultura e desenvolvemento económico local”. Nesta mesa coincidirán un hostaleiro, un adegueiro, unha queixeira e unha xornalista. Modera Mónica de la Torre -Dpto de Hostalería e Turismo do IES Val do Asma-.
Na recta final da xornada farase a entrega de galardóns Folión 2019 ao gandeiro/a de honra, ao mestre/a carroceiro/a e ao socio/a honorífico/a; e despois da clausura oficial, ás 20:00 h., terá lugar a presentación e proxección do video-documental “Folión de Carros 1981”, de Miguel Carbonell.
