InicioMedio ambiente e PatrimonioInauguración da 'ruta dos xeomiradoiros' de Ribas de Sil

Inauguración da ‘ruta dos xeomiradoiros’ de Ribas de Sil

O Moto Clube A Curuxa de Quiroga, en colaboración co Concello de Ribas de Sil, organizan este domingo 27 un roteiro con paradas en varios miradoiros de gran interese paisaxístico e xeolóxico.

Publicado o

- Advertisement -

O pasado mes de agosto, na VI Concentración Moteira que organizaba o Moto Clube A Curuxa de Quiroga, contemplábase a realización dunha saída dominical para inaugurar a ruta dos xeomiradoiros do Concello de Ribas de Sil pero por mor da choiva tívose que suspender. Este domingo 27 será o día no que se leve a cabo finalmente a actividade na que se percorrerán varios miradoiros con espectaculares vistas de puntos de interese xeolóxico.

A saída dos/as motoristas participantes está prevista para as 11:00 h. da mañá dende a Casa do Concello de Ribas de Sil en San Clodio. Dende aquí pasarase por Rairos e subirase a Torbeo onde se atopa o primeiro miradoiro, o “Xeomiradoiro Pena do Ladeiro”. Ten máis de 20 anos e foi restaurado recentemente, dende aquí pódese ver a desembocadura do río Lor e Augas Mestas.

Deixando Torbeo, a ruta continúa ata o “Xeomiradoiro da Cubela” dende o cal se pode gozar da espectacular vista do coñecido meandro da Cubela. A partir de aquí ascéndese ao “Alto do Coto”, entrando un pouco na provincia de Ourense e pasando polo Miradoiro de Pena do Xastre en Castro Caldelas, con mámoas tamén para visitar na contorna. O roteiro continúa entrando tamén un pouco no Concello de San Xoán de Río e, xa no “Alto da Moá”, os/as motoristas encamiñaranse cara Ribas de Sil.

A seguinte parada será o “Xeomiradoiro das Fontes”, “o mellor para ver a inmensidade do xeoparque cos vales fluviais do sur e os pregamentos” segundo nos di Roberto Castro, tenente de alcalde de Ribas de Sil. Nesta parada, sobre as 12:00 h., reuniranse os 3 alcaldes dos concellos por onde pasa a ruta, a alcaldesa de Castro Caldelas, o alcalde de San Xoán de Río e o de Ribas de Sil como momento protocolario para a inauguración oficial da ruta. A continuación, o Director do Museo Xeolóxico de Quiroga, Ramón Vila, ofrecerá unha breve explicación sobre o Xeoparque Mundial Montañas do Courel.

Baixando xa para chegar ao punto de partida quedará por ver o “Xeomiradoiro da Pómez” dende onde se divisa o Val de Quiroga.

As actuacións para acondicionar a ruta dos xeomiradoiros está financiada polo Concello de Ribas de Sil e, en maior medida, pola Dirección Xeral de Turismo e o Plan Leader a través do GDR Ribeira Sacra-Courel como accións de valorización do Xeoparque.

Convocatoria do Moto Clube A Curuxa para a ruta

ÚLTIMAS

Sinistro de circulación en Chantada

Segundo informou o 112, o persoal do Servizo de Urxencias Sanitarias de Galicia-061 foi...

A Deputación esixe á Xunta o remate urxente da estrada de Folgoso do Courel derrubada hai dous anos

A Deputación de Lugo esixe á Xunta de Galicia medidas urxentes para axilizar e...

O Club Quixós participa estes días na 2ª Copa de España de Eslálom Olímpico

O Club de Piragüismo Quixós, de Monforte, chegou con dez deportistas a terras catalás...

O IES Daviña Rey e o CEIP Plurilingüe Monte Baliño contarán con Clubs de Lectura nas Bibliotecas

Un total de 431 centros escolares, 53 deles de nova incorporación como serán o...