Este domingo, 5 de xullo, o souto de Lobios acolleu un obradoiro do músico e artesán Pablo Carpintero para ensinar á xente a fabricar instrumentos musicais con codia de castiñeiro, instrumentos que os nenos galegos levan facendo milenios.

O obradoiro foi posible grazas á amabilidade dun dos propietarios, José Pérez Rodríguez, que deu permiso aos máis de trinta participantes nesta actividade para traballar coas poliñas dos castiñeiros milenarios que forman este souto, un dos máis imponentes que hai en Galicia.    

Os instrumentos a elaborar foron varios tipos de pipas, xipros, frautas de tres furados, violíns de castiñeiro, a gaita dobre de Vilariño de Conso, algúns asubíos e, por suposto, as tobas. Trátase de instrumentos milenarios con técnicas de fabricación moi sinxelas que os maiores fabricaban cando eran cativos.