Este catálogo encádrase na serie de Cadernos da Estación Científica do Courel, e constitúe un gran exemplo de traballo de investigación e divulgación do patrimonio natural da provincia. Dende a Deputación de Lugo colaboran co Campus Terra e coa Estación Científica do Courel no estudo dos macrofungos das montañas orientais lucenses. Un estudo que busca a aplicación práctica do coñecemento no desenvolvemento de plans de aproveitamento sostible, así como no impulso do micoturismo e a micogastronomía.
Este traballo é unha aproximación ao coñecemento e catalogación da macromicobiota correspondente ás divisións Basidiomycota e Ascomycota das montañas do Courel, inventariando e describindo 410 taxons para o territorio, que xunto con 126 distintos taxons previamente citados por outros autores, e tamén recollidos neste traballo, fan un total de 536 taxons referenciados, un importante número reflexo da gran biodiversidade fúnxica das montañas do Courel, o que se corresponde coa diversidade xeolóxica, climática e florística deste territorio.
Dos 410 taxons descritos, 322 son primeiras citas publicadas para o territorio das montañas do Courel, 109 para a provincia de Lugo, 48 para Galicia, 5 para a Península Ibérica, e unha é primeira cita europea: Simocybe serrulata. O estudo realizouse durante algo máis de 3 anos (outono de 2016 ata finais 2019) de periódico traballo de prospección micolóxica no territorio, complementado nos laboratorios da Estación Científica do Courel e do departamento de Produción Vexetal e Proxectos de Enxeñaría da Escola Politécnica Superior de Enxeñaría do Campus Terra.
