Este luns, 28 de xuño, comezan os traballos de roza do xacemento medieval Penas do Castelo, na ribeira do Río Lor na parroquia de Salcedo, A Pobra do Brollón. Os traballos serán realizados pola empresa forestal Foresga e supervisados pola empresa Árbore Arqueoloxía e Restauración.
‘O control arqueolóxico garante que o xacemento non sufra danos durante a roza,’ comenta Benito Vilas, arqueólogo. ‘Grazas a esta limpeza comprenderemos mellor este xacemento, polo de agora bastante enigmático, así como as súas dimensións e límites.’Tal e como aparece na ficha de catalogación, pola súa forma e tipoloxía o máis probable é que se trate dun xacemento altomedieval e non se descarta que teña unha orixe anterior, na primeira Idade do Ferro.
O xacemento presenta un sistema defensivo monumental e moi visible, ademais está nunha situación privilexiada sobre o río Lor con magníficas vistas da paisaxe.‘Este sitio é un recurso de gran interese na rede de recursos arqueolóxicos visitables no noso Concello, polo que este verán xa estará incluído no circuíto de visitas guiadas’, comenta o alcalde, Xosé Lois Maceda.
A intervención está enmarcada no proxecto Penas do Castelo que se define como de arqueoloxía de aldea, promovido pola Asociación Veciñal e a Comunidade de Montes de Salcedo, e mais o Concello da Pobra do Brollón. O proxecto publica vídeos nas súas redes sociais nos que os veciños falan do que consideran o elemento patrimonial máis importante da aldea para cadaquén.
Máis alá da roza e o traballo audiovisual cos veciños, están previstas outras accións e actividades. ‘Trátase de crear dinámicas comunitarias a través da arqueoloxía,’ comenta Marisa Defente, membro das directivas da Comunidade de Montes e da Asociación Veciñal. ‘Ademais, crearemos un recurso turístico interesante para os negocios da aldea ao tempo que un recurso didáctico e de pertenza para os máis pequenos’.
