O Alumnado de 1º Bacharelato e de Imaxe Persoal do IES A Pinguela saíu a estudar a contorna do río Cabe para estudar a súa flora e microfauna. Foron guiados por Ramsés Pérez, de ADEGA (Asociación para a Defensa Ecolóxica de Galicia) e polos profesores de Bioloxía e Asesoría de Imaxe Persoal. Foi unha actividade do Proxecto Ríos, un programa do Plan Proxecta do IES A Pinguela.
Pola súa banda o alumnado de 1º Bacharelato Ciencias vén de realizar unha ruta xeolóxica guiada por Eduardo Clavijo. O xeólogo levou ós estudantes a coñecer lugares singulares da zona sur de Lugo con interese
científico coma Montefurado, Vilanuide, Castelo de Torrenovaes, miradoiro
xeolóxico de Vilariño, pregamento xeolóxico de Campodola-Leixazós, alto do Boi…
Remataron na canteira de San Clodio cunha clase práctica sobre minerais.
Finalmente o alumnado de 1º ESO do IES A Pinguela achegouse á cultura hip hop da man do colectivo Hip Hop Feminino El Salvador. O obxectivo é que os mozos e mozas coñezan a loita destas mulleres que pertencen a un colectivo co que traballa a cooperación internacional galega, e que reflexionen sobre a realidade dos países empobrecidos a través da voz das súas protagonistas, mostrando o HIP HOP como unha ferramenta para o activismo e a promoción da cultura de paz.
Hip hop Feminino El Salvador fundouse no 2015 e ao longo destes anos foi
forxando fortes lazos co movemento feminista, traballando con diferentes
organizacións en actividades dedicadas á muller e á defensa dos dereitos
humanos.
Este proxecto é posible grazas a unión de tres ONGDs, Solidariedade
Internacional de Galicia, Asociación Galega de Comunicación para o Cambio
Social (Agareso) e Asemblea de Cooperación pola Paz (ACPP) e ao
financiamento da Dirección Xeral de Relacións Exteriores e coa UE da Xunta
de Galicia. Forma parte da plataforma de innovación educativa ‘Plan
Proxecta’, impulsada pola Consellería de Cultura, Educación e Ordenación
Universitaria.
