O Grupo Municipal do BNG de Monforte vén de anunciar que os seus concelleiros non participarán nos actos institucionais organizados polo Concello de Monforte de Lemos con motivo do 8 de marzo, Día Internacional das Mulleres.
Desde o BNG de Monforte sinalan que as institucións deben ser exemplares e actuar con responsabilidade, coherencia e credibilidade. “Non se poden dar leccións de feminismo desde o propio Concello de Monforte mentres non se actúe de maneira consecuente cos principios que di defender”, sinalan os concelleiros nacionalistas.
O feminismo non é unha cuestión estética nin unha cita no calendario, senón un compromiso firme coa transformación social, coa erradicación das desigualdades e coa defensa activa dos dereitos das mulleres. Por iso, o BNG considera que, “mentres a situación política actual continúe sendo a mesma, non se dan as condicións para participar en actos institucionais organizados polo Concello de Monforte que pretenden representar uns valores que non se están a garantir na práctica”.
O BNG reafirma o seu compromiso firme e histórico coa loita feminista e anuncia que na vindeira semana fará público un calendario de actividades propias en toda a comarca de Terra de Lemos para conmemorar o 8 de marzo. Estas iniciativas terán como obxectivo contribuír á reflexión, á mobilización social e á defensa real e efectiva da igualdade. Desde o BNG de Monforte reiteran que “o feminismo é unha loita colectiva que require coherencia, responsabilidade e compromiso político real, máis alá de declaracións institucionais”.
