Segundo trasladan dende o Consorcio de Turismo Ribeira Sacra “trátase dunha medida disuasoria para desconxestionar un dos puntos máis visitados da ribeira do Miño durante o período estival, que polas súas condicións, ao igual que outros recursos turísticos de Ribeira Sacra, non dispón de espazos de estacionamento o suficientemente amplos para acoller todos os vehículos que se achegan ata alí durante o verán, e que adoita dificultar o tránsito e manobras dos de maior tamaño”.
Tendo en conta que a contorna da Praia da Cova forma parte da Reserva da Biosfera, estamos a falar dun espazo natural de especial protección que debe preservarse. Para iso o recomendable é fomentar o uso do transporte colectivo e evitar a contaminación que provoca o tráfico masivo que se dá nos meses de verán nesta emblemática paraxe da Ribeira Sacra.
SERVIZO LANZADEIRA ESCAIRÓN-A COVA
O servizo de bus lanzadeira funcionará todos os días dos meses de xullo e agosto e contará cunha capacidade aproximada de 20 prazas. Haberá saídas cada hora, en horario de tarde, dende a Praza de España da localidade de Escairón no Concello do Saviñao.
A alternativa para chegar á Praia da Cova, por vontade do Concello, será un servizo gratuíto de bus para visitantes e veciños/as co fin de sensibilizar a locais e visitantes nesta fase inicial. Malia iso, recoméndase a súa reserva previa con fin de garantir a dispoñibilidade de prazas. Terán preferencia aquelas persoas con reserva que estará habilitada a partir do día 30 de xuño a través da plataforma do Consorcio de Turismo.
Aínda que os accesos por estrada á Praia da Cova continuarán abertos ao tráfico rodado só se poderán utilizar as prazas habilitadas e sinalizadas na actualidade para o estacionamento, debendo deixar libres as beiras da estrada, habitualmente utilizadas polos vehículos para aparcar.
O Concello do Saviñao colaborará cun equipo de Protección Civil que informará a usuarios e controlará que se estacione de forma axeitada durante os primeiros días de funcionamento do servizo e sempre que se requira.
PLAN DE SOSTIBILIDADE TURÍSTICA
O pasado verán púxose en marcha o primeiro autobús lanzadeira no Concello de Parada de Sil. Tratábase, neste caso, de facilitar o acceso ao mosteiro de Santa Cristina de Ribas de Sil dende o propio concello. Este ano é o concello o que asume a continuidade do servizo que xa estivo operativo durante a Semana Santa.
A pretensión do Consorcio é poñelos en marcha, facer os axustes precisos para que sexan viables e sostibles, e despois deixar que as entidades locais asuman a súa continuidade nos vindeiros anos. “Estas iniciativas pretenden controlar a capacidade de carga de recursos visitados, mellorar a súa accesibilidade, promover o uso de transporte colectivo para un menor impacto ambiental e optimizar a experiencia dos visitantes e habitantes, minimizando as problemáticas no estacionamento e tránsito por estradas sinuosas e estreitas”, explica a xerente do Consorcio, Alexandra Seara.
