A proposta da alcaldía comeza facendo referencia a que os incendios forestais iniciados o xoves, 14 de xullo, na contorna das poboacións de Froxán, Eiriz e Seceda, e que se viron agravados fortemente nos días sucesivos por mor das elevadas temperaturas, expandíndose a gran parte do termo municipal e arrasando aproximadamente 11.100 hectáreas de terreo, propiciaron o que o artigo 2.5 da Lei 17/2015, de 9 de xullo, do Sistema Nacional de Protección Civil denomina situación de “ emerxencia de protección civil” ou “emerxencia extraordinaria”, a cal vén constituída por unha situación de risco colectivo sobrevida por un evento que pon en perigo inminente a persoas ou bens e esixe unha xestión rápida por parte dos poderes públicos para atendelas e mitigar os danos e tratar de evitar que se converta nunha catástrofe.

“Consecuencia delo, centos de brigadistas terrestres e aéreos e de efectivos da Unidade Militar de Emerxencias desprazáronse á contorna do Xeoparque Mundial Montañas do Courel para participar nas labores de extinción, loitando incansablemente, xunto con voluntarios e voluntarias, así como con veciños e veciñas que decidiron permanecer nas súas aldeas para defender persoalmente os seus fogares, na sufocación dos lumes. Todo o Concello foi testemuño da extrema gravidade da situación que se vivíu, e que puxo en risco colectivo o noso municipio, xerando un estado de perigo inminente ás persoas e bens, tal e como demostran as sucesivas resolucións da Consellería de Medio Rural, decretando, como medidas preventivas, a situación 2”.

O fume afectou a multitude de núcleos de poboación arrasando vivendas e infraestruturas privadas, plantacións, equipamentos agrícolas, apícolas e forestais; propiciou o desaloxo de moitos veciños e veciñas das súas vivendas por mor dunhas lapas que ameazaban con destruír todo canto se atopaban ó seu paso; obrigou a pechar diversas estradas de acceso ó municipio; xerou cortes de subministro eléctrico; afectou a traídas e auga; arrasou aldeas e calcinou boa parte do patrimonio natural, flora e fauna do noso entorno. En definitiva, a situación revestiu un carácter de emerxencia extraordinaria e excepcional sen precedentes.

A proposta da alcaldía sinala que unha vez estabilizada a situación cómpre dar inicio á fase de recuperación, sendo preciso que tódalas Administracións Públicas poñamos en marcha un conxunto de accións e medidas de axuda que se dirixan a restablecer á normalidade da zona sinistrada e coadxuven a paliar os aínda hoxe incalculables danos producidos.

Sinala que o Concello de Folgoso do Courel encóntrase, a día de hoxe, nunha situación de “catástrofe”, a cal, de acordo co regulado no artigo 2.6 da Lei 17/2015, de 9 de xullo, do Sistema Nacional de Protección Civil, é unha
situación ou acontecemento que altera ou interrompe substancialmente o funcionamento dunha comunidade ou sociedade por ocasionar gran cantidade de vítimas, danos e impactos materiais, cuxa atención supera os medios dispoñibles da propia comunidade.

Con todo o pleno aprobou:

• Solicitar ó Goberno de España a declaración de zona afectada gravemente por unha emerxencia de protección civil, a fin de que os veciños e veciñas poidan resultar beneficiarios das liñas de axudas que se contemplan no texto legal. Asimesmo, solicitar á Subdelegación do Goberno colaboración técnica suficiente aos efectos de tramitar as solicitudes das axudas que se insten polos afectados ó amparo do Real Decreto 307/2005.
• Solicitar á Xunta de Galicia apoio técnico para levar a cabo as tarefas de valoración e avaliación dos danos e para facilitar ós veciños e veciñas a tramitación das liñas de axudas ás que poderán acceder os afectados ó abeiro das sucesivas convocatorias que se publiquen con base ó Decreto da Vicepresidencia Segunda e Consellería de Presidencia, Xustiza e Deportes nº 130/2022 de 21 de xullo, de medidas urxentes de axuda para a reparación dos danos causados polos incendios que se produciron en Galicia durante o mes de xullo de 2022, publicado no Diario Oficial de Galicia o venres, 22 de xuño de 2022.
• Solicitar á Deputación Provincial de Lugo a convocatoria dunha liña de axudas ou subvencións para atender as necesidades derivadas desta situación de emerxencia de natureza catastrófica.
• Ofrecer a colaboración deste Concello para a avaliación dos danos
  producidos, así como para a tramitación das solicitudes de axuda que se formulen polos afectados.