Despois de dous anos de parón obrigado debido ás restricións orixinadas pola pandemia do Coronavirus, a volta á normalidade permítelle aos veciños e veciñas de Salcedo poder levar a cabo as actividades habituais na celebración dun dos Entroidos máis tradicionais de Galicia.

Así, volven as funcións de teatro popular, con obras escritas, dirixidas e representadas pola veciñanza. Coma sempre, as funcións serán o sábado día 18 de febreiro e o domingo 19 ás 22:00 horas, e as entradas xa están á venda na Cantina de Julia (982430222) e no Hotel O Forno-A Salanova (982430501). Dende a Asociación esperan que, igual que nos últimos anos, as entradas se esgoten varios días antes das representacións.

O domingo, ás 17:00 será o pregón, que este ano corre a cargo de Alfonso Zarauza, director de cine galego, gañador de 13 premios Mestre Mateo pola película Ons no ano 2021. Despois do pregón sairán as Madamas e os Danzantes e, por primeira vez en moito tempo, recupéranse os Disfraces de Campo, representacións mímicas e cómicas que parodian sucesos de actualidade.

O luns, 20 de febreiro, volve o Rei do Entroido de Salcedo: o Oso. A figura máis ancestral e primitiva desta mascarada volverá tinguir aos presentes acompañado dos seus criados. Todo isto acompañado de música de grupos como Los mecánicos, gaiteiros, charangas e orquestras dente o domingo ata o martes.