O equipo de goberno do concello de Monforte está ultimando todos os detalles para a posta en marcha do Plan de Xestión da materia orgánica para o municipio. En base á Directiva Europea, o Plan de Xestión que ideou o executivo contará fundamentalmente con dúas liñas de actuación, unha que achegará unha solución para a zona máis urbana e outra, que contemplará un servizo para todas as vivendas que contan con parcelas e hortas, tanto no centro urbano como nas diferentes parroquias.

O concello de Monforte asegura que facilitará á veciñanza todos os servizos e os medios necesarios para que poidan separar adecuadamente os residuos orgánicos que xeran nos seus fogares. O Plan tamén engloba ós chamados “grandes produtores”, isto é, supermercados, restaurantes, centros de saúde ou outros organismos que xeren grandes cantidades deste tipo de residuos orgánicos.

Para poder solicitar os composteiros individuais na zona rural, os interesados poden facelo de 3 formas:

• Na páxina web do Concello ubícase un banner na portada principal que levará a un formulario que terá que ser cuberto para poder optar ao devandito compostador. Ó formulario pódese acceder neste enlace
• No Rexistro do Concello onde lles axudarán a cubrir o devandito formulario.
• No 982 402 501 e especificando que queren inscribirse neste programa de composteiros do Concello.

Para participar neste programa hai que estar censados en Monforte e que a leira ou terreo no que vaian instalar este composteiro, se sitúe no termo municipal. Os usuarios teñen que comprometerse a utilizar adecuadamente devandito composteiro, para comprobar a execución faranse visitas de seguemento.

Coa posta en marcha do Plan de Xestión da materia orgánica do Concello de Monforte, o obxectivo do Equipo de Goberno é “reducir a xeración de residuos, posto que a fracción orgánica, é dicir, os restos de comida que orixinamos nas nosas vivendas, constitúe case a metade do contido da nosa bolsa do lixo.” E a través da liña de compostaxe doméstica, a produción de compost conleva a redución da materia orgánica que se deposita nos contedores e cubos de basura, e permite obter un abono natural e gratuíto.

A tenente de alcalde, Gloria Prada anima ós veciños de Monforte a participar nesta primeira liña do Plan de Xestión da materia orgánica, “Repartiranse os composteiros a medida que se vaian solicitando, e unha vez que os técnicos municipais comproben que os solicitantes cumpren cos requisitos requiridos.”

Todo o plan contará cunha campaña informativa e publicitaria en medios de comunicación e a través dun buzoneo masivo. Haberá tamén accións de rúa nas que monitores especializados encargaranse de informar e explicar pormenorizadamente este novo servizo. Para desenvolver este Plan de Xestión da Materia Orgánica de Monforte, o concello conta cun orzamento inicial que alcanzará os 337.000 euros.