A coordinación do proxecto internacional, interdisciplinar e interinstituciona corre a cargo de Sonia García Rodríguez e a dirección arqueolóxica de Xurxo Ayán Vila (Instituto de História Contemporânea, Faculdade de Ciências Sociais e Humanas da Universidade NOVA de Lisboa).
O equipo está formado por un total de 12 profesionais da arqueoloxía e investigadoras do Instituto de Ciencias do Patrimonio do Consejo Superior de Investigaciones Científicas (INCIPIT – CSIC) de diferentes disciplinas: antropoloxía cultural, etnografía, palinoloxía, edafoloxía, antropoloxía forense e arqueoloxía.
O proxecto, iniciado en 2021, ten tres obxectivos principais:
- Procurar datos empíricos para coñecer a orixe da Ribeira Sacra como espazo simbólico, na Alta Idade Media.
- Levar a cabo datacións de C-14 en perfís estratigráficos dos calexotes (terrazas para o cultivo da vide) para abordar a orixe da paisaxe vitivinícola da Ribeira Sacra.
- Consolidar un recurso patrimonial visitable no canón do Sil, a carón dunha ruta de sendeirismo homologada que parte de Pombeiro e chega ata a aldea abandonada de Sancosmede.
Terceira campaña de escavación arqueolóxica Preguntoiro / Equipo de escavación
Nesta nova intervención abórdase a ampliación do sector de escavación cara ao norte, abranguendo unha superficie de 40 m2. Nesta área albíscase unha estrutura anexa á capela do San Xoán Degolado, a cal xa estaría erguida no século XIII da nosa era, dacordo coas datacións de C-14. Nesta zona tamén hai indicios de construcións anteriores que poden estar vencelladas co eremitorio e necrópole rupestre asociada, do século X. Así, a campaña permitirá unha mellor comprensión da orixe e evolución deste espazo desde a Alta Idade Media ata a implantación do feudalismo e do veciño mosteiro de San Vicenzo de Pombeiro.
Con esta campaña daráselle contexto á relación entre a capela e as terrazas da contorna inmediata. A análise dos calexotes en campañas anteriores, nas que tomáronse mostras de terra, permitiu datalas mediante o C-14. O obxectivo agora é entender a evolución construtiva entre as terrazas e as edificacións. Ata o momento contábase coas datacións dun contexto arqueolóxico semellante no lugar dos Conventos, tamén escavado polo mesmo equipo de traballo en 2019 e 2020, en Vilachá, A Pobra do Brollón.
Un proxecto de Arqueoloxía Pública
As escavacións arqueolóxicas están abertas ao público, de luns a venres. Ás doce do mediodía, cada día, hai unha visita guiada a cargo da dirección do proxecto arqueolóxico. Na fin do proxecto haberá unha Xornada de Portas Abertas. Na páxina do proxecto en Facebook transmítese en tempo real o avance das investigacións.
Terceira campaña de escavación arqueolóxica Preguntoiro / Equipo de escavación
