Por segundo ano a Rede polo Patrimonio (RPC) realizará diferentes actividades para contribuír á visibilización do patrimonio cultural galego e das entidades que o promoven, protexen e poñen en valor. Entre as propostas hai roteiros, xornadas de antropoloxía, medio ambiente e protección do patrimonio; concursos de fichas patrimoniais realizado pola Escola de conservación e restauración de Bens Culturais ou de fotografía pola Asociación cultural e pedagóxica Ponte nas ondas e exposicións de útiles neolíticos. Outras propostas para os vindoiros días son os obradoiros a cargo de O Suído, regueifas organizadas polo Clube da Lingua, presentación de documentais pola Asociación Festa da Prehistoria ou magostos celebrados pola Irmandade Druídica Galaica. Finalmente, celebraránse actos de homenaxe ás Irmandades da Fala ou a presentación dun mapa interactivo de bens patrimoniais contrapondo o mapa do ‘voo americano’ de 1956 e, simultaneamente, ofrecendo a súa vista actual da man de http://patrimoniogalego.net

Toda a información, horarios, lugares e días do resto de actividades pódese consultar na web redepatrimonio.gal

Entre as actividades, O Colado do Vento organiza unha charla baixo o nome “O monte tamén é cultura”. Correrá por conta do axente forestal, Felipe Castro. A cita, este 16 de novembro o venres, ás 19:30 h na Casa da Cultura de Sober.

A Rede do Patrimonio Cultural

A Rede do Patrimonio Cultural botou a andar o día 3 de xuño de 2017 nun acto celebrado no Museo do Pobo Galego no que se aprobou un documento avalado por 69 asociacións e entidades galegas relacionadas co patrimonio cultural.

A RPC entende o noso patrimonio cultural como un dos principais activos sociais, identitarios e económicos de Galicia e, polo tanto, un recurso estratéxico para a sociedade galega contemporánea que debe ser conservado e transmitido, nas mellores condicións, ás vindeiras xeracións. Por iso, acolle a entidades que teñan por obxectivos a defensa e posta en valor do patrimonio cultural galego, tanto material como inmaterial.