O Proxecto Libera busca concienciar sobre a problemática da contaminación en xeral e dos vertedoiros incontrolados en particular. Nesta edición, o punto de partida será a contorna da Ponte Mourulle, unha das paraxes máis senlleiras do municipio de Taboada, contando así coa participación da asociación veciñal das Insuas, que leva varios anos en activo nestas parroquias taboadesas.

Trátase dunha actividade que a Asociación O Carballo pretende consolidar, “logo de que o ano pasado, a modo de anécdota, nos acompañasen a Directora Xeral de Medio Ambiente e o Xerente de Ecoembes, interesados pola posta en marcha desta iniciativa nun concello rural e desde un colectivo”, sinalan.

O obxectivo fundamental é concienciar sobre a contaminación e os problemas de xestión dos residuos que lle afectan ao medio ambiente e á paisaxe, polo que animan a todas as persoas interesadas a participar nesta recollida, o 17 de marzo, ás 10h desde a Ponte Mourulle.